KRALENDIJK – E konosido kompania di kòsmetika, Penha, pronto lo habri su porta na Boneiru. Esaki por wordu konkluí for di diferente anunsiunan kaminda e kompania ta anunsia ku pronto lo habri su promé tienta riba e isla.

Penha ta hopi konosí pa su edifisio íkono na Handelskade na Kòrsou. E kompania no solamente tin diferente tienta na Kòrsou, pero tambe ta aktivo na -entre otro- Aruba i Sint Maarten. Ounke e kompania ta konosí spesialmente komo un perfumeria i tienta ku ta bende produktonan di beyesa den e segmentu di merkado mas haltu, e kadena tambe ta virando mas i mas aktivo ora ta trata di bende diferente paña di marka di renombre mundial.

E negoshi di famia a keda fundá na añu 1865 i ainda awe den man di e famia ku a kuminsá ku esaki mas ku 150 aña pasá. Na Boneiru, Penha lo habri entro otro den District Shopping Center serka di rotònde di Hato.

Entusiasmo

Riba media sosial, hopi habitante di Boneiru a reakshoná kontentu ora ta menshoná yegada di e kompania íkono na Boneiru.