WILLEMSTAD – Jacintha Constancia, anterior minister di Salubridat, mester akudí awe na prizòn SDKK. Einan e mester bai sinta un kastigu di binti luna en konekshon ku e kaso di tapaboka na e Ofisina di Seguro di Gastunan Médiko, BZV. Su anterior pareha, Anbertus Schoop, tambe mester mèldu su mes, el a haña e mésun kastigu. Ámbos a bai kasashon, pero e sentensia den korte di apelashon a keda para. 

Korte di apelashon a duna un kastigu di prizòn di 21 luna, pero a apliká un redukshon di un luna, pa motibu di e durashon di e prosedura na Korte Supremo. Esaki ta trese e kastigu final na binti luna di kastigu di prizòn pa Constancia i binti luna pa su èks-pareha Scoop.

Constancia i su pareha Scoop a hasi nan mes kulpabel na froude na Stichting Bureau Ziektenkostenvoorzieningen BZV. BZV ta un instansha di gobièrnu ku tabata kai bou di Constancia tempu ku e tabata minister di Salubridat.

Nan a inskribí un empresa ku un nòmber Chines na Kamara di Komèrsio i a krea un oferta komo faktura pa BZV pa entrega di e tapabokanan. E montante di e faktura i oferta tabata ekstremadamente haltu, pero pa motibu di e aktuashon di e anterior minister, BZV a aseptá e oferta i e faktura.

Den e kaso aki BZV no a sigui e prosedura nòrmal i a paga un suma di sèn den un solo biaha na e empresa Chines. Un amigu di Scoop tabata pará na kabes di e empresa Chines. Despues di a risibí e sèn Scoop a lanta tur e sèn.  E tapabokanan no a yega Kòrsou nunka.

Bataya

Constancia a deklará anteriormente ku no ta un sekreto ku e ta involukrá den un bataya hurídiko pa mas ku nueba aña kaba pa prueba su inosensia.

E minister mes ta di opinion ku e no a malversá sèn, ku e no ta kulpabel di froude òf labamentu di plaka, pero ku sinembargo ta ten’é responsabel pa komplikashonnan. “Esei ta e úniko punto, nada otro. Jacintha no a hasi niun hende nada”, segun Constancia ta deklará den Èxtra.

El a deklará na e matutino ku el a haña kastigu sinku biaha. “Mi mester paga un montante di 365.000 florin ku otronan a risibí di BZV i a gasta. Tambe mi imáhen komo hende muhé, persona i polítiko ta dañá.”

“Ademas mi mester sinta mi kastigu i lo hasi esei tambe i den boka di pueblo ta yamami ladron i kriminal. Ta violá mi derechonan komo persona i hende muhé”, segun e èks-minister.