KRALENDIJK- Fondo di Penshun Caribische Nederland (PCN) ta implementá un indeksashon intermedio di penshun pa 1 di sèptèmber próksimo. E indeksashon ta di 3%.

Normalmente, na fin di kada aña, e fondo ta evaluá si ta posibel indeksá penshunnan pa e prókismo aña kalendario. Na fin di 2022 sin embargo e grado di kubertura ainda bou bou di e nivel ku lo a hasi posibel un oumento di penshunnan entrante 1 di yanüari 2023.

Spesialmente dor di e subida relativamente fuerte di interes riba merkadonan di kapital, e grado di kubertura di PCN a krese bastante fuerte durante e último lunanan, yegando na mas ku 124% na fin di yüni. Tambe e invershonnan di e fondo a yuda krese e kapital di e fond ku un rendimentu di kasi 7% durante e último lunanan.

“Ta un echo ku inflashon, tambe riba nos islanan, tabata eksesivamente haltu den último lunanan. Pesei lo ta amargo si nos no por adaptá penshonnan e aña aki ètòl na e kostonan di bida ku a subi,” asina e presidente di PCN, Harald Linkels, a bisa.

Ounke direktiva por a skohe pa indeksá penshonnan te na 1 di yanüari 2024, a desidí pa, komo ekspepshon, adaptá e di penshunnan intermedio, teniendo kuenta ku e inflashon haltu persistente. Si ta posibel pa bolbe oumentá penshonnan atrobe entrante promé di 1 di yanüari 2024, ta dependé di e grado di kubertura  na final di e aña. “Direktiva lo evaluá posibilidat pa bolbe indeksá e penshunnan entrante promé di di yanüari 2024 na fin di e aña koriente,” asina Linkels a bisa.

Tambe pa partisipantenan aktivo

E indeksashon no ta benefisiá solamente e penshonadonan ku ta disfrutando kaba di nan penshun. Den kaso di indeksaashon na PCN, tambe e partisipantenan aktivo i e asina yamá ‘slapers’ ta aumentá ku e mesun porsentahe, manera ta apliká pa e penshonadonan.

Ku “slapers” ta referí na èks-partisipantenan ku na momentu aki nan no ta kontribuí mas pa medio di prima -por ehèmpel ora nan a bai traha pa un doño di trabou ku no ta afiliá na PCN-, pero ku sí tin derechi riba un pago parsial ora nan yega e edat di penshun.