DEN HAAG – E parlamentario ku raisnan antiyano, Jorien Wuite (D66) a anunsiá djarason via su kuenta privá di LinkedIn ku no lo ta partisipá den e elekshonnan binidero pa Parlamento hulandes. 

Wuite ta bisa ku den e último 2.5 aña, ku orguyo ela liderá e esfuerso pa Kultura i Relashonnan den Reino, mientras tambe tabata presidente di e komishon di Komèrsio Stranhero i Koperashon pa Desaroyo, impulsá pa e idealnan di D66. 

Logronan notable ta inklui rehabilitashon di sektor kultural despues di e pandemia i sosten parlamentario pa e industria di televisión i pelíkula, manera Wuite a spesifiká. 

Wuite a subrayá mas aleu su lucha pa un sektor kultural inklusivo unda hóben kreadó nan krese, basá riba kresensia di konfiansa i inovashon. Tambe ela lucha pa establesimentu di un pa un Mínimo Sosial na Hulanda Karibense, reforsá relashonnan den Reino, i e diskulpa históriko di Hulanda pa pasado di sklabitut. 

Desapuntá

Hopi hende riba djarason a reakshoná ku sentimentonan di desapunto riba e anunsio di Wuite. Wuite, huntu ku Sylvana Simmons di e partido Bij1, ta dos di e parlamentarionan ku mas aktivamente a sali na interes di e islanan BES i CAS.