Kantante Izaline Calister tainvitá músiko/direktor di teatro Thijs Borsten pa kana e Ruta di Tula. E héroe nashonal Tula a kana e ruta aki durante e lantamentu di katibu riba 17 di ougùstùs 1795.

Durante e paseo Izaline i Thijs ta topa ku artista-, músiko i historiadonan i un pastor ku ken nan ta papia tokante Tula i e influensia ku e tin awendia. Komo gradisimentu Izaline i Thijs ta toka pa kada wéspet un kansion ku ta pas.

Tula ta e kara di e lantamentu di katibu mas grandi na Kòrsou. Henter su bida el a biba i traha bou di sirkunstansianan deplorabel na plantashi Knip. Riba 17 di ougùstùs 1795 e ta disidí huntu ku sinkuenta otro persona ku a hasi katibu di pone trabou abou i rebeldiá.

Ora nan no ta haña oido serka doño di plantashi Casper Lodewijk van Uytrecht, e grupo ta bai direkshon di kapital pa protestá serka gobernadó. Na kaminda nan ta pasa otro plantashi i mas persona ku nan a hasi katibu ta djòin i e grupo ta krese bira alrededor di dos mil guerero.

Finalmente e luchadó pa libertat aki mester a paga su kurashi i liderasgo ku morto, méskos ku hopi di su siguidónan. Despues e lantamentu a krese bira un símbolo nashonal di balor propio na Kòrsou. Na 2010 a proklamá Tula komo héroe nashonal di Kòrsou.

Por mira e dokumentario aki riba djaweps 17 di ougùstùs, e dia ku ta rekordá e rebelion di Tula, na NTR na NPO 2 pa 23.15. Relashoná ku esaki por mira èkstra na NPO 2, den kareda di mei anochi, e konsierto ku ta akompañá e dokumentario ku nan a graba na plantashi Sòrsaka na Kòrsou, komo desenlase di Tula su biahe.