Kralendijk- Entrante djaluna 14 di yüni residentenan di Boneiru, Saba i St. Eustatius kompletamenté bakuná awor aki tambe por bula bai St. Maarten, sin ku mester hasi un tèst di PCR promé ku e biahe.

Esaki Minister di Salubridat Públiko di St. Maarten, Omar Ottley, a anunsiá. Pa por biaha sin nesisidat di tèst mester a pasa e di dos bakuna no ménos ku 2 siman promé ku e fecha di biahe. E regla ta konta pa e residentenan di St. Maarten mes tambe.

Tambe ta nesesario, promé ku e fecha di biahe, pa yena un deklarason tokante salú riba e wèpsait di gobièrnu di St. Maarten. Hasiendo esaki i yenando e detayenan, entre otro di bakunashon, e sistema lo saka un kódigo QR, ku kual e pasahero por kuminsá su biahe sin problema.