WILLEMSTAD – Un kandela trágiko a kosta bida di dos persona den un kas na Kaya C. Ostiana, den e bario Nort Sapaté. E kandela a kuminsá algun minüt promé ku meianochi.

Habitantenan den e besindario a kore bin yuda ora ku nan a mira e vlamnan. Nan a logra skapa un hòmber i un muhé for di e kas ku tabata na kandela, pero lamentablemente ámbos víktima tabata inkonsiente kaba na e momentu ei. A pesar di e reakshon rápido di e servisionan di emergensia, e personal di ambulans i e dòkter di polis presente no por a hasi nada mas pa nan. Na e sitio mes a konfirmá morto di e dos víktimanan.

Ta sospechá ku e víktimanan a muri a konsekuensia di inhalashon di huma. Brantwer a yega e sitio lihé i tabatin e kandela rápido bou di kontrol, apesar di e intensidat di e kandela. 

E kousa di e kandela no ta konosí ainda i outoridatnan lokal ta investigando esei na e momentunan aki.