KRALENDIJK- E akusashon di lider di frakshon Daisy Coffie den direkshon di diputado Hennyson Thielman a drenta seriamentu bou di kuero di e direktiva di Movementu di Pueblo Boneriano (MPB).

Coffie a kuestioná integridat di Thielman i a hasi un apelashon riba dje pa tene honor na su mes i pa tuma retiro, relashoná ku e echo ku e kompania di Hype Event Planner, manehá pa kasá di Thielman no tin e pèrmitnan nesesario.

“Sumamente lamentabel, kondenabel i hasta ínfantil: Esaki tabata nos promé pensamentu despues ku nos a lesa e komunikado di prensa di Movementu 21 (M21) kaminda diputado Thielman ta wòrdu ataká – no riba su maneho, sino personalmente – i hasta ta sugerí ku e lo mester renunsiá”, asina direktiva di e partido blou a skirbi djamars mainta den un deklarashon.

Segun MPB, ta trata di un negoshi di kasá di Thielman i diputado mes lo no ta envolví den maneho di e negoshi. MPB hustamente ta di opinion ku Thielman a aktua di un manera nèchi i trasparente, entregando tur informashon relevante.

Buladó di kurá
“Nos no por spera otro di un buladó di kurá, ku e ta blas e asuntu for di tur proporshon” asina direktiva di MPB a skibi, mientras ku den e deklarashon na Hulandes ta asta akusá Coffie di a ‘hòrta’ un asiento di MPB.

Ku nan remarke, MPB ta referí na e echo ku Daisy Coffie a separá for di MPB durante e periodo anterior di gobernashon i a sigui komo miembro independiente. Sinembargo, e partido ta ignorá e echo ku Coffie, ku su partido M21, den elekshonnan di mart 2023 a logra di konkistá un asiento den konseho insular, di modo ku ya no por papia mas di un asiento ‘hòrtá’.

Por lesa e deklarashon kompleto di direktiva di e partido blou aki:

---

Sumamente lamentabel, kondenabel i hasta ínfantil: Esaki tabata nos promé pensamentu despues ku nos a lesa e komunikado di prensa di Movementu 21 (M21) kaminda diputado Thielman ta wòrdu ataká – no riba su maneho, sino personalmente –  i hasta ta sugerí ku e lo mester renunsiá.

Den e kaso aki ta hopi importante pa hasi algun pregunta krítiko. Na promé lugá, mester puntra si ta na su lugá pa atendé personalmente ku diputado Thielman pa ku e negoshi ‘Hype Event Planner’ ku ta riba nòmber di su kasá. Ademas, mester puntra si e negoshi mester di un pèrmit di konstrukshon si òf nò. E permit pa konstrukshon a keda pidí pero esaki a keda rechasá. E rechaso ta basá riba sierto interpretashon di lei i regla ku un tènt no por keda pará un kaminda pa mas largu ku un periodo. Si e periodo indiká pasa mester bolbe pidi un pèrmit. Pa evitá ku kada bes mester renobá e pèrmit a pidi un pèrmit di konstrukshon. Pero, basá riba ku loke tin einan ta keda kategorisá komo un tènt, e pèrmit di konstrukshon a keda nengá i ku rasón. E pèrmit di evenementu por sierto ta keda bálido i ta kubri tur e aktividatnan. Esey ta nifiká ku no por papia di ningun ílegalidat den henter e asuntu aki.

Artíkulo 41b di e lei di Munisipio (Gemeentewet) i artíkulo 48 di WolBES ta establesé ku un diputado di un munisipio i un diputado na Boneiru no por desempeñá kualke funshon sekundario ku por pèrhudiká kumplimentu adekuá di e funshon di diputado. Artíkulo 48 insiso 2 ta preskribí ku un diputado mester mèldu su intenshon pa un funshon sekundario na Konseho Insular. Te asina leu no tin indikashon ku diputado Thielman tin un funshon sekundario ku ta indeseabel. Si esaki ta e kaso anto Konseho Insular tin tur derecho pa atendé ku diputado Thielman riba esaki.

Artíkulo 49 di WolBES sinembargo ta preskribí ku un diputado mester deklará por eskrito na e representante di Reino, eksáktamente tur interes komersial i bienes ku e i su kasá tin òf ta atministrá. Segun artíkulo 51 di WolBES e representante di Reino tin e deber di tene tur kos sekreto i solamente por duna informashon òf deklarashon na e instansianan ku ta enkargá ku investigashon penal. No ta pòrnada ku e deklarashon menshoná ta bai pa e representante di Reino i mester keda sekreto, pues esaki ta netamente pa protehá un diputado kontra atakenan baho i sushi manera ta e kaso awor.

Un diputado ta pèrmití tin un ínteres komersial i ta nòrmal ku e interesnan ta keda poné na un distansia, di forma ku e  maneho di e negoshi òf e interes no ta den man di e diputado. Ku un ínteres komersial òf un negoshi, ta bini aserka asuntunan di pidimentu di pèrmiso i obligashonnan di pagonan di impuesto ètséterá. Ta hopi ínfantíl pa kulpa e diputado den e kuadro aki di un komportashon no étiko i ku ela ehersé influensia.

Manera e kódigo di kondukta ta preskribí, diputado Thielman tabata dispuesto pa kontestá e preguntanan den Konseho Insular tokante e interes komersial al kaso, kaminda atrobe mester enfatisá ku e no ta involukrá den e operashon diario di e negoshi. Pues debidamente ela demonstrá di ta habrí i transparente, lokual ta pèrmití Konseho Insular di tin un bista óptimal i por husga e aktuashon di e diputado i e rasonamentu tras di esaki.

E lider polítiko di M21 ku ta sra. Coffy tur dia tin su boka yen ku nos mes hendenan mester haña oportunidat pa okupá puestonan haltu den nos komunidat. Durante e selebrashon di Dia di Boneiru ela ekspresá masha bunita palabra ku mester krea un ambiente kaminda diferente kultura por floresé i mester tin rèspèt pa otro. Probablemente e tabata tin e komunikado venenoso ya prepará kaba pa publiká esaki, pues tur su bunita palabranan tabata un farse. Segun dikshonario esun ku ta finhi otro di loke e realmente ta, ta keda kategorisá komo un hipókrita. 

Nos no por spera otro di un buladó di kurá, ku e ta blas e asuntu for di tur proporshon. Ta hasi manera e diputado a áktua na un manera no íntegro, tur esten ku a keda komprobá ku e diputado no a ni tuma ningun akshon ni tabata tin influensha den e asuntu aki. Lamentablemente e ínteres general di e pueblo di Boneiru sí ta keda afektá profundamente, pasobra kandidatonan potensial pa bira diputado òf miembro di konseho insular lo bai pensa dos tres biaha pa skohe pa esaki. Mirando ku un sèt di aventurero polítiko ta daña nan nòmber i di nan famia i ta purba di destabilisá e komunidat Boneriano. Hopi tristu.

Direktiva di Movementu di Pueblo Boneriano – MPB