ORANJESTAD – Aktualmente Aruba ta analisando implementashon di un pasport digital riba bo telefon inteligente. E inisiativa inovativo aki ta dirigí riba simplifikashon di prosesonan di biahe i identifikashon.

SITA, un operadó lider di IT pa industria di aviashon, a demonstrá huntu ku gobièrnu di Aruba ku éksito e implementashon di teknologia di identifikashon-verifikashon digital, di moda ku  por eliminá e nesesidat pa pasaheronan mustra nan pasport físiko na yegada riba e isla.

Durante un keynote discussion siman pasá na un konferensia na Montreal, e empresa aki i e direktor di Imigrashon di Aruba a enfatisá ku e desaroyo di identifikashon di biahe digital ta duna e pasaheronan e oportunidat pa krea un vershon digital seif di nan pasport digital riba nan telefon, di akuerdo ku e normanan di International Civil Aviation Organization, ICAO.

Permanente

Despues di un seri di tèst eksitoso, kaminda a hasi uzo di identifikashon digital òf Digital Travel Credentials (DTC) desaroyá pa SITA i nan sosio Indicio, gobièrnu di Aruba ta spera di por implementá identifikashon digital permanente pa bishitantenan ku ta bini Aruba. Ku esaki Aruba lo ta un di e promé paisnan na mundu ku ta hasi esaki.

Na luna di mart ámbos partido a demostrá ku pasaheronan ku ta yega Aeropuerto Internashonal Reina Beatrix tabatin e posibilidat pa pidi nan outorisashon di biahe via un proseso simplifiká ku ta eliminá e nesesidat di pone informashonnan di dokumentonan di biahe manual riba papel.

Ora ta uza identifikashon digital e pasahero por duna pèrmit mésora pa kompartí informashon relevante ku diferente entidat for di nan ‘pòtmòni digital’ riba nan telefon durante nan biahe, for di nan yegada te otro puntonan di kontakto manera hotèl òf kompania di hür outo.