KRALENDIJK- Un konflikto komersial aparentemente ta impaktando lider di Partido Demokrátiko Boneiru (PDB) den un sentido negativo.

Segun matutino Extra, e konflikto tin su origen den un pedido ku Fundashon Mariadal a  hasi serka un kompania di Abraham, kaminda hospital lo a paga pa un pedido di klechi di kama, pero e kompania lo no a entregá esakinan ainda. 

Den komberashon ku Awor.nu Abraham a bisa ku e no ke drenta den mucho detaye tokante e kaso. “Den tur relashon komersial por surgi diferensha di opinion i asta konflitko. Esakinan tambe mester resolvé den esfera komersial i no den polítika. Nan dos no tin nada di haber ku otro.” Abraham no ta nenga ku tin un konflikto andando, pero ta relativá loke a sali den sierto medionan di prensa.

Tiramentu di lodo

E ‘notisia’ di Extra tokante e konflikto di Abraham ku Fundashon Mariadal no por wòrdu mirá lòs for di e tiramentu di lodo ku e isla a mira den último simannan tras di lomba. Esaki a kuminsá ora miembro di Konseho Insular Daisy Coffie (M21) a tilda diputado di MPB Hennyson Thielman di komportashon no étiko relashoná ku e kompania Hype Event Planner, i a hasi un apelashon riba Thielman di tene honor na su mes. 

Personanan direktamente liá na MPB despues di esaki ,riba medionan sosial, a akusá Coffie di debenan problemátiko di impuesto, i Abraham di tin entre otro di tin un karchi penal. 

Fuente di entrada

Miembresia di Konseho Insular na islanan BES ta un trabou di partaim, ku un pago ku ta kai asta bou di salario mínimo. Pesei, miembronan di Konseho Insular ta dependé di otro fuente di entrada pa mantené nan mes i nan famia. Algun konsehal ta hasi esaki den forma di empleo serka un doño di trabou, pero otronan ta manehá nan propio negoshi.