KRALENDIJK – Un estudio di komparashon di preis ku Tienda pa Konsumidó a ehekutá ta indiká ku Caribe Nobo konstantemente ta ofresé e opshon mas barata pa kompradónan riba e isla.

Den e promé siman di sèptèmber, e tim di Tienda pa Konsumidó a bishitá 17 negoshinan, inkluyendo e supermerkadonan mas grandi na Boneiru, ku a koperá pa suministrá informashon tokante preis. E komparashon inkluí 139 produkto diferente for di lista básiko di konsumidó di Tienda Konsumidó Boneriano, durante 1 te ku 2 di sèptèmber 2023. Caribe Nobo a sali komo e opshon mas ekonómiko.

E organisashon di konsumidó ta enfatisá ku Caribe Nobo di manera konstante ta ofresé preisnan kompetitivo. “Durante e último 7 lunanan, Caribe Nobo a mantene di manera konstante un lugá den e top 3 di supermerkadonan ku ta ofresé e ofertanan di preis mas ekonómiko pa e produktonan kompará. Despues di Caribe Nobo, Voordeelmarkt Warehouse i Wing Cheung na Kaya Korona a desempeña bon.”

Mihó surtido

Además di preis, Tienda pa Konsumidó tambe a eksaminá kual supermerkado tabatin e kantidat mas haltu di produkto for di lista riba nan estante. Famoso Supermarket a skorá mas haltu den e kategoria aki, seguí pa Foody Mark i Kadushi.

E organisashon ta remarká ku e komparashon di preis no a tuma na konsiderashon e kalidat, higiena òf pais di orígen di e produktonan. E último punto aki ta e motibu pa algun supermerkadonan riba e isla pa nenga di partisipá den e estudio, pasobra nan ta konsiderá ku esaki ta pone nan inhustamente den un lus negativo.