KRALENDIJK – Dia 27 di sèptèmber Tourism Corporation Bonaire durante un kumbre ku partnernan na nos isla riba Dia Mundial di Turismo ofisialmente a lansa su Bonaire Podcast. E podcast den kua tantu bishitantenan di nos isla komo numeroso habitantenan i ekspertonan lokal ta kompartí informashonnan dibertido, ideanan i eksperensianan personal, awor akí ta disponibel riba Spotify. Entre luna di sèptèmber i luna di desèmber 2023 nan ta transmití en total seis episodio, kada un ku su propio tema, i entre dos episodio tin un durashon di tempu di 2 pa 3 siman.

E promé episodio di e Bonaire Podcast ku nan a kaba di lansa ta enfoká riba ‘Naturalesa’, den liña ku e enfoke ku nos isla tin riba preservashon i e lema ‘It’s in our Nature’. Durante e promé episodio akí nan ta hiba e oyentenan riba un ‘paseo di oudio’ den Parke Nashonal Washington Slagbaai, nan ta topa ku un persona lokal ku ta papia ku lora i nan ta siña mas tokante e inisiativanan di nos isla pa preservashon i protekshon di nos rekursonan natural, manera e Nature Tag di STINAPA i Bonaire Bond.

Den e sinku episodionan ku ta keda den aña 2023, nan ta trata e siguiente tópikonan: Sambuyamentu i snòrkelmentu dia 11 di òktober; Kultura dia 25 di òktober; Kulinario dia 8 di novèmber i Viva la Villa tokante Boneiru su produkto di vila i eksperensianan eksklusivo na nos isla dia 22 di novèmber. Dia 13 di desèmber nan ta transmití e último episodio di aña 2023, den kua inisiativanan riba tereno di sostenibilidat ta para sentral. E promé i e último episodio di Bonaire Podcast den aña 2023, esta naturalesa i sostenibilidat, ta e pilánan simbóliko entre kua e sobrá kuater episodionan ta tuma lugá, komo un kinipí di wowo den direkshon di e temanan ku ta asina kerí pa Boneiru.

Kada un di e episodionan di e podcast ta dura mas òf ménos 30 minüt i nan ta grabá na hulandes. Leonie di Jong, fundadó di Jouw PodcastMaker i periodista freelance di radio na entre otro NOS, a graba material pa Bonaire Podcast durante un biahe di prensa pa Boneiru na luna di mei di e aña akí. De Jong a produsí, meks i monta henter e podcast. Akinan bo ta haña Bonaire Podcast, pero tambe via e kanalnan online di Boneiru riba bonaireisland.com/nl, Facebook i Instagram @BonaireToerisme.