KRALENDIJK – Federashon General di Trabou di Boneiru (AFBW) ta kondená fuertemente loke nan deskribí komo abusu di empleadonan den sektor di HORECA na Boneiru, spesífikamente na Azul Properties N.V., e operador di restorant di Courtyard-by-Marriott Hotel.

Trahadónan na e kompania aki a ser informá riba di un dia pa otro ku nan no mester mas presentá na trabou pasobra e operashon ta kambia pa un otro operadó. E forma di proseder aki, segun e sindikato, ta ilegal. Segun Presidente di AFBW, Cherrel Kwidama, e situashon na Courtyard no ta úniko i situashonnan similar a sosodé resientemente na restorant manera Trocadero i Mi Poron.

Lei di labor

Konsehero di AFBW, Norwin (Nòchi) Willem ta insistí riba kumplimentu ku e leinan di labor vigente. “Nos ta spera tambe ku otro aktornnan den e sektor di hotèl i restorant manera BONHATA, TCB, i outoridat lokalnan kuminsá aktua kontra e tipo di abusu aki.

E terminashon no-legal di kombenionan di trabou no ta e úniko preokupashon di e sindikato. Segun AFBW, kontinuamente ta skucha ku ke atraé turismo di un sierto klase i den último elekeshon a papia masha kos tokante mehorashon di kondishonnan di trabou den sektor turismo di e isla. “Pero te awe nos ta mira nada di esaki”, asina Willem a bisa. 

Salario abou

“Trabou den sektor HORECA ta mira salario. Ta papia di atraé turistanan di segmentonan mas haltu. Ken lo atendé e turista di klas haltu aki? E mesun hendenan ku ta risibí un sueldo hopi abou? E kos aki no por kontinuá!” Willem a bisa enfátikamente.