WILLEMSTAD – Wardakosta pa Reino Hulandes den Karibe for di 2 di òktober último tin un Direktor Suplente nobo, den persona di Joëlle De Jong-Mercelina. 

E direktor suplente nobo ta bira responsabel pa ehekushon di tareanan di Wardakosta i e ehekushon interno di maneho di Wardakosta, ku esaki e tin pues e guia diario den e organisashon.

Segun un komunikado di De Jong-Mercelina ta apto pa e funshon akí, danki na su karera impreshonante entre otro na Ministerio di Hustisia na Kòrsou na unda su último funshon tabata Sekretario General Suplente. Su konosementu amplio di mantenshon di lei, aplikashon di lei internashonal, lei marítimo i tambe su ‘background’ di relashonnan eksterior por keda fásilmente apliká na Wardakosta. 

Banda di esaki e tabata miembro suplente di e Presidensia di e Komishon di Wardakosta na nòmber di Kòrsou i e tin eksperiensha komo eks dosente di Derecho Públiko Internashonal na Universidat di Antia Hulandes/Kòrsou. E ta tambe un eks miembro di VKC ‘Vrijwilligerskorps’ di Antia Hulandes. 

Promé hende muhé

De Jong-Mercelinae lo ta e promé dama ku lo fungi den e funshon akí di Direktor Suplente di Wardakosta (PDKW). Wardakosta ta ekstendé un kaluroso bon biní na Joëlle De Jong-Mercelina na e organisashon i ta dese’é hopi éksito.