WILLEMSTAD – Resientemente a lanta un kapítulo di Karibe Hulandes di e asina yamá “Association of Certified Fraud Examiners (ACFE)”. 

E inisiaitiva aki, segun e miembronan di ACFE, ta marka un paso importante den lucha kolektivo kontra fraude den ekonomianan lokal. E kapítulo lokal tin komo meta pa brinda un plataforma pa hasi kontakto, komparti konosementu, i desaroyo di abilidatnan pa promové un enfoke konhuntamente riba prevenshon di fraude. Ku e sosten di otro miembronan di ACFE i aprobasion di ACFE Internashonal, e kapítulo aki lo krea un ambiente pa kambia ideanan i práktika mihó pa konbatí fraude. 

ACFE Dutch Caribbean Chapter no ta keda enfoká solamente riba miembronan, pero tambe ta organisá entrenamentu i informá e públiko en general tokante tendensianan di fraude. E kapítulo aki ta inkluí henter Karibe Hulandes i ta promové kolaborashon i kompartimentu di konosementu den henter region. 

Direktiva

E direktiva di e kapítulo ta inklui Benno van Leeuwen (presidente), Ruud de Dood (vicepresidente), Dieudonné (Neetje) van der Veen (sekretario), Jos Leppers (tesorero), Wim Nijdam (koòrdinadó di entrenamentu), i Nadyerda Wall.