KRALENDIJK – Konseho di Gobierno di Boneiru a ser mandá kas den anochi di djamars pa djarason ora ku a bira kla ku e koalishon no por konta mas ku un mayoria den Konseho Insular.

Un voto di deskonfiansa, entregá pa miembro di konseho insular Clark Abraham di Partido Demokrátiko, a risibí sostén di miembro di konseho Cyril Vrolijk di Movementu di Pueblo Boneriano (MPB). Despues di duna sostén na e moshon, Vrolijk a deklará su mes komo independiente for di MPB, kambiando asina e dinámika den Konseho Insular. Union Patriotiko Boneiru (UPB) a retené su 3 asiento, pero MPB a keda ku solamente 1 asiento. E partido blou a bai bèk kaba di 4 asiento pa 2 despues di último elekshon.
Banda di UPB ku MPB Konseho Insular ta wòrdu formá pa Partido Demokrátiko ku 3 asiento, M21 di Daisy Coffie ku 1 asiento, i for di djarason mardugá, frakshon Vrolijk.

Preshon

Den e reunion hopi largu, ku a kuminsá pa 4’or atardi i a terminá despues di 12 ‘or di anochi tabatin presión grandi riba Konseho Eehekutivo i e diputadonan. Nan a enfrentá preguntanan tokante un variedat di tema, for di BONLAB te kon manera Entidat Públiko ta trata ku empleado temporal. E echo ku no tabatin kontesta konkreto na un kantidat inmenso di preguntanan for di Konseho Insular a kousa iritashon durante henter anochi.

Di otro banda por a nota ku e kantidat di pregunta tabata asina grandi ku i ku tantu interupshon, ku e diputadonan kasi no tabata haña chèns pa kontestá tur esakinan.
Den e próksimo dianan lo bira kla kua partidonan lo uni nan forsa pa forma un koalishon gubernamental nobo ku por konta ku mínimo 5 for di e 9 asientonan.