KRALENDIJK- Konsehal Benito Dirksz, di frakshon Union Patriotiko Boneriano (UPB) ta haña hopi lamentabel kon 5 miembro di Konseho Insular a ‘masakra’ diputado Jolinda Craane den reunion públiko di Konseho Insular djamars pasá. 

Señora Jolinda Duncan-Craane a asumí e puesto di diputado riba petishon di partido UPB pa traha komo un “vakgedeputeerde”. “Jolinda Craane no tabatin vinkúlo polítiko ni ta un polítiko”, asina Dirks a skibi den un deklarashon djabièrnè atardi”. 

Segun Dirks ta bisa, e no ta komentá riba e tumbamentu di gobierno, ni e no ta husga niun hende, saliendo for di punto di vista ku kada un di nan lo a aktua egún nan konsenshi.

Pero Dirks ta indigná si ku e forma kon a trata Craane. “Nuebe miembro di Konseho Insular a duna Jolinda Craane nan voto di konfiansa pé por a bira diputado i apenas 5 luna después, 5 di e 9 miembronan di Konseho Insular a aktua manera un “vuurpeloton” i a fusilá Jolinda Craane di un forma barbaro, kruel i repudiabel. Jolinda Craane NO a meresé un moshon di deskonfiansa!”, asina Dirks ta bisa. 

Segun Dirks a sigui bisa, e argumentashon ku a resaltá ta, pasobra ku miembronan di Kolegio Ehekutivo tin “kolegial bestuur” pues e 5 miembronan di Konseho Insular mester a kaba ku Kolegio Ehekutivo inkluyendo Jolinda Craane “cueste lo que cueste”.

Nunka bisto

Dirks a bisa tambe ku, ounke for di aña 2006 ela drenta politika, nunka ela mira un masakre asina riba un hende ku no ta ni polítiko. 

“Esnan ku a kometé e barbaridad aki mester tabatin e elegansia i desensia pa por a pidi Jolinda Craane pa e entregá su retiro komo diputado. Ku e moshon di deskonfiansa kontra di Jolinda Craane, su persona a haña un mancha polítiko komo un persona inkonfiabel i inkompetente ku lo keda marká den e historia di polítika Boneriano”, asina Dirks ta trese dilanti. 

Dirks ta bisa tambe ku e ke ekspresá su sinsero palabranan di agradesimentu pa e trabounan ku Jolinda Craane a hasi pa nos komunidat durante di su periodo komo diputado.

“Jolinda Craane, sea orguyoso di bo mes i mantené bo kara na laira, pasobra abo NO a hasi nada robes te pabo sinti bo mes malu. Jolinda Craane, mi kier yamabo públikamente na nòmber di frakshon di UPB, DANKI”, asina Dirks a klousurá.