WILLEMSTAD – No ta persiguí Suzy Carmelia-Römer pa su aktuashon en kontra di e Ordenansa Sentral di Integridat pa kandidatonan pa minister. Apesar di e echo ku por a papia di inkumplimentu pa informá di un funshon sekundario. Mirando e lapso di tempu den e kaso aki i e importansia limitá ku lo hustifiká persiguishon ainda, a disidí pa desestimá e kaso aki i no sigui ku persiguishon.

Segun Ministerio Públiko e akusashon a konsentrá riba e echo ku na 2015 Camelia-Römer tabata inskribí ainda komo direktor di Blue Liaison Real Estate ora ku el a bira minister di Tráfiko, Transporte i Planifikashon Urbano.

Na òktober 2015 numa el a kita su nomber for di registro di Kamara di Komèrsio, pero a duna komo fecha òktober 2014, di manera ku tabata parse komo sifuera el a kita su nòmber kaba promé ku su periodo komo minister.

Carlos Monk, ku a hasi denunsia, a bisa e tempu ei: “Loke nos ta mira pues, ta un modus operandi di falsifikashon di dokumentu i malversashon. I pakiko; pasobra sino e lo no a pasa e Lei di Skrudiñá. Kambiando e fecha, a parse komo sifuera el a kita su nòmber promé ku e periodo ku el a bira minister. Pero nada ménos ta bèrdat.”

Ministerio Públiko ta enfatisá e importansia di integridat dentro di e atministrashon públiko i ta bisa ku ta esensial ku kandidatonan pa minister ta kumpli ku reglanan i ta transparante tokante nan funshonnan sekundario.  Ministerio Públiko ka keda vigilá kumplimentu ku Ordenansa Sentral di Integridat di kandidatonan pa minister i si mester ta aktua kontra eventual faltamentu.