Kralendijk- E konteiner yen di bòter di gas ku a bòltu djarason anochi, ta kasi blòkia por kompleto e salido for di waf Nello Craane den sentro di suidat.

E insidente por tabata tin konsekuensianan hopi severo, ya ku esaki a tuma lugá djies pegá ku diferente establesimentu kaminda hende ta sinta kome den aire liber. Hendenan presente na e sitio a papia di un holó bastante fuerte di gas.

Polis ku brantwer rápidamente a blòkia kaminda rondó di e área. Djaweps mainta ainda tabata besig ta deskargá e bòternan di gas for di e konteiner en kestion.

Kiko eksaktamente a kousa a aksidente no ta kompletamente kla ainda. Ta wòrdu bisá ku e shoufùr di e loader ku tabata sakando e konteiner lo a hasi un ‘maniobra straño’ pero esaki no a keda konfirmá dor di autoridatnan presente.

Haf nobo

E insidente di djarason anochi ta mustra un biaha mas riba e nesesidat di un haf nobo, ku no ta situá den sentro di suidat, kaminda tin yen aktividat di turismo tambe ta tumando lugá.