DEN HAAG – Ku kasi 20.000 voto, alrededor di 29 porshento di tur voto, PvdA/GROENLINKS a bira e partido mas grandi den e elekshon pa Tweede Kamer. Esei e ofisina nashonal di korespondensia a publiká. Ta trata di e resultado di tur votadó pafó di Hulanda ku por a depositá nan voto via karta na e ofisinanan nashonal di korespondensia na Aruba, Kòrsou, Sint Maarten i Den Haag.

VVD a finalisá na di dos lugá ku algu mas ku 12.000 voto, kasi djesocho porshento di tur voto via karta. Nieuw Sociaal Contract di Pieter Omzigt a logra haña kasi 8.400 voto ku ta djes porshento.

PVV di Geert Wilders ku a bira e partido mas grandi na Hulanda mester a konformá su mes ku kasi 4.500 voto, loke ta ekivalente na mas ku seis porshento di e votonan. El a bira e di sinku partido.

Partisipashon 

Na tur 70.000 persona ku por a vota a depositá nan voto. A registrá algu mas ku 107.000 votadó pa e elekshon aki. Ku esaki e persentahe di partisipashon ta kasi 65 porshento. Mas ku djeskuater porshento a depositá nan voto via karta na embahada- i konsuladonan-general.

Di e 107.000 votadónan registrá kasi 1.300 votadó por a depositá nan voto ku un pas di voto. I mas ku 1.600 votadó a laga un persona na Hulanda depositá nan voto via un poderashon por eskrito. Por a depositá e votonan aki na e urnanan elektoral di munisipionan Hulandes i no ta mira esakinan den e resultado di e ofisina nashonal di korespondensia. 

E kasi 1.800 personanan ku derecho pa vota registrá, ku ta residensiá temporalmente den eksterior, no ta inkorporá den e total di 107.000 persona ku derecho di voto registrá. E votonan via karta aki ta kontá den e ofisinanan nashonal di korespondensia na Den Haag, Kòrsou, Sint Maarten i Aruba.