KRALENDIJK- Direktorado di Supervishon i Mantenshon lo realisá kòntròl di preis pa determiná den ku medida e akuerdo hasí tokante Bon Kompra Plus, o sea e yamá ‘makutu básiko,’ ta wordu kumplí. 

Bon Kompra Plus ta un inishativa ku a surgi a petishon di organisashon di konsumidó UNKOBON. Awor ku ta anunsia ku aña benidero tin un subida substansial di salario mínimo, OLB ta kier evitá ku esaki resultá den un eksplosión di preis komo konsekuensia di e kambio aki.

Pa motibu di esei, awor lo tuma luga un investigashon pa asegurá ku e preisnan den e makutu básiko keda pagabel pa komunidat di Boneiru. Kolegio Ehekutivo (BC) ta bai pa stabilidat i balansa riba e merkado, manteniendo tambe protehé interesnan di e habitantenan.

“Nos ta determiná pa asigurá ku e subida recién di salario mínimo na Boneiru no resultá den un subida eksesivo di preis ku tin un impakto negativo riba nos komunidat. E kòntròlnan di preis aki ta un paso pa garantisá estabilidat di nos ekonomia i pa mantene bida pagabel pa tur hende,” segun Komisario Clarck Abraham.

Kompartí

BC ta prometé pa kompartí resultadonan di e investigashon ku komunidat.