WILLEMSTAD – Caribbean Research & Management of Biodiversity, mihó konosí komo Carmabi, a kompartí resultadonan alentador tokante e resistensia kontra blikiamentu di koral di koralnan resien kultivá, apesar e ola di kalor ekstremo ku a asotá Kòrsou e aña aki. E hazañanan aki ta forma un desaroyo importante den e investigashon di mantenshon i rekuperashon di koral.

Den partinan grandi di Karibe e mésun ola di kalor a okashoná daño konsiderabel na refnan di koral, serka hopi sorto ku tabata mustra señalnan serio di blikiamentu. Na Kòrsou, kaminda hopi koral tambe tabata manifestá señalnan di strès, tin speransa awor ku e situashon lo mehorá awor ku e temperatura di awa a baha.

Secore International, un partner duradero di Carmabi ku ta spesialisá den rekuperashon di ref di koral, a hasi investigashon di salú di e koralnan selebral yòn ku a kultivá for di material di reprodukshon.

Blikiamentu di koral

E strès di kalor di un kolonia adulto di koral serebral ta kondusí na ‘blikiamentu’ pasobra alganan simbiótiko ta proveé nan anfitrion, e koral, di  kuminda pa medio di fotosintésis, pero ta kuminsá produsí tóksiko na momento ku e awa di laman keinta mas ku 29 grado.

Pa e motibu ei e koral ta obligá di ekspulsá nan. Pasobra e alganan aki ta duna koralnan nan koló bèrdè/maron típiko, ta parse ku e koral ta blikia ora ku e ekpulsá e alganan. E tehido di  koral mes ta transparante, di moda ku e skelèt blanku abou ta bira visibel. P’esei ta yama e fenómeno aki na Ingles coral bleaching, blikiamentu di koral.

Potensial 

E koralnan yòn, entre un i kuater aña, no tabata manifestá señalnan di blikiamentu, segun e investigadónan, kontrali na hopi kolonia di adultonan den nan besindario. A nota e fenómeno aki tambe serka otro tiponan di koral na diferrente sitio manera Mexico, Repúblika Dominikano i Cuba.

E opservashonnan aki ta enfatisá e potensial di krio di koral i téknikanan di restorashon basá riba prokreashon seksual. For di 2010 Secore i Carmabi ta traha huntu na perfekshoná e téknikanan aki.

Durante eventonan anual di prokreashon di koral ta kolektá i mesklá gametonan di koral pa krea mas ku shenmil  desendiente di koral úniko genétiko. Esaki ta duna un oportunidat di diversividat genétiko, loke ta krusial pa adaptashon i sobrebibensia di koral bou di diferente sirkumstansia.

Ideanan nobo

Te ku awe Secore i Carmabi a pone miles i miles di koral yòn di diferente sorto den awanan rònt Kòrsou. E echo ku e koralnan yòn aki ta mas resistente kontra blikiamentu di koral ku nan ekivalente adulto, ta duna ideanan nobo den e dinámika di resistensia di koral i kapasidat pa adaptá. Esaki ta enfatisá e importansia di investigashon kontinuo i esfuersonan pa rehabilitashon di koral pa sostené populashonnan di koral menasá.

No a komprondé kompletamente ainda e mekanismonan eksakto tras di e resistensia mas grandi di koralnan yòn kontra strès di kalor. Posibel splikashonnan por ta faktornan genétiko òf bentahanan mará na nan tamaño chikitu. E hazañanan aki ta duna un kontribushon balioso na konosementu di mantenshon di koral i ta duna speransa pa esfuersonan den futuro pa rekuperá i protehá refnan di koral menasá.