WILLEMSTAD – Kas  sin tualèt òf sin flur òf otro fasilidatnan básiko: mas ku 3.300 kas na Kòrsou ta den un situashon asina malu, ku no ta responsabel pa biba eiden. Sinembargo e kasnan aki no ta pará bashí i hendenan ta biba gewon eiden.

Esei ta pará den e rapòrt ‘Curaçao nog steeds een eiland van extreme woonsituaties’, ku ta eksponé un realidat preukupante. Un grupo di siudadano preukupá a traha e rapòrt i ta hasi un yamada pa un proyekto na eskala grandi pa drecha e kasnan den nesesidat aki.

Pero  te ainda no a duna oido na e yamada. Aña pasá a duna Reda Sosial e rapòrt, pero no a bini niun reakshon. Seguidamente a entregá e rapòrt na gobernador, ku a primintí di komuniká ku un representante di gobièrnu, pero te ku dia di awe e komishon no a tende nada. 

Despues e komishon a bai Defensor di Pueblo i e representante Hulandes tambe a haña un ehemplar. E na su turno a entregu’é na sekretario di estado Alexandra van Huffelen.

Señora Van Huffelen a haña e rapòrt bon i a konsehá e komishon pa aserká gobièrnu pa nan por hink’é den e landspakket. A base di e konseho aki e siudadanonan preukupá a entregá e rapòrt na parlamento i na gobièrnu, pero atrobe nada no a pasa.

SEDA

Finalmente e organisashon a disidí di entregá e rapòrt na SEDA, un organisashon dinámiko, sperando ku nan lo kontinuá ku e proyekto pa ataká e situashon di pobresa den bibiendaan.

Meyrtha Leetz-Cijntje di Sentro pa Desaroyo di Dama i su Famia (SEDA), un organisashon ku ta dediká su mes na hendenan muhé i nan famia, ta enfatisá e urgensia di e proyekto. “Tin chèns ku nos no por hasi nada otro ku laga basha e kasnan abou,” e ta splika. “Ta trata di kasonan hopi tristu ku ta preukupámi hopi.”

E storianan di e habitantenan ta hasi hopi doló. Efraim Cijntje, un di e inisiadónan, ta deskribí kon e situashonnan malu di bibienda ta kondusí na trouma, problemanan na skol serka muchanan i asta kasonan di insesto. E situashonnan ekstremo aki ta enfatisá e urgensia pa interví.

E rapòrt ta proponé un proyekto di renobashon ambisioso, balotá na alrededor di 260 mion florin, ku posiblemente finansiamentu di Hulanda, Union Europeo òf Estados Unido.

Segun esnan embolbí e situashon na Kòrsou ta eksigí atenshon inmediato. E kombinashon di kasnan bieu, un kantidat kresiente den mal estado, i e impakto riba kalidat di bida di e habitantenan ta hasi’é un kestion di interes nashonal. E rapòrt no ta eksponé solamente e problemanan, pero ta ofresé tambe un kaminda pa mehorashon, sperando riba akshon di e partidonan embolbí.