Kolegio Ehekutivo di Entidat Públiko Boneiru (OLB), sostené pa PDB, M21, i Frakshon Vrolijk, a indiká ku nan ke yega pa un maneho di kompra ku ta na interes di empresanan lokal. 

Esaki a sali dilanti durante e konferensia di prensa simanal di Kolegio Ehekutivo, den reakshon riba preguntanan di Bonaire.nu. For di un estudio resien di Bonaire.nu, en kolaborashon ku e ofisina di Linkels & Partners, a resultá ku solamente 15% di e empresarionan lokla ku a partisipá na e enkuesta ta pensa ku gobiènunan na Boneiru ta duna preferensia nan provedónan lokal ora di kumpra produkto òf servisio.

Tantu diputado di ekonomia, Clark Abraham, komo diputado di asuntunan sosial, Nina den Heyer, a enfatisá ku pa kolehio ehekutivo ta hopi importante pa hasi negoshi ku empresarionan lokal. 

Nan a menshoná komo un prioridat pa delineá un maneho pa esaki, pa loke ta trata gobièrnu di Boneiru. “Ta empresarionan lokal esnan ku ta kontribuí na e ekonomia, paga impuesto, i ta invertí nan ganashi riba e isla mes”, asina diputado Abraham a bisa. 

Krítika

Por nota ku ultimamente tin mas i mas krítik riba komersianto djafó ku ta bende produkto òf servisio na Boneiru, sin ku nan negoshi ta registrá na Boneiru, sin ku nan ta paga impuesto i si ku ta hasi invershon lokal. 

Segun diputado Den Heyer, ta importante pa Boneiru invertí den su propio hendenan. Ela bisa tambe ku Boneiru ta desaroyando i ku tin profesional bon ekipá na Boneiru mes.