KRALENDIJK – Water- en Energiebedrijf Bonaire (WEB) a menshoná riba djarason su intenshon pa siña di e diferente insidente ku interupshon di koriente. 

“Despues di a restablesé e suministro di koriente kompletamente riba e isla, e timnan tékniko di WEB i CGB a traha huntu pa detektá e kousa di e akontesimento desafortuná aki. Un investigashon bon i profundo ta importante pa tur esnan konserní”, asina WEB a komuniká den transkurso di djarason. 

Tambe e kompania ta bisa di realisá ku nan ta konsiente ku suministro konfiabel di koriente ta algu hopi importante pa e isla. Siña di e insidentenan aki ta un prioridat pa nos. Nos ta implementá e medidanan nesesario pa evitá futuro interupshon i nos ta keda dediká nos mes na brinda suministro di koriente di kalidat haltu, ku énfasis riba konfiabilidat i stabilidat di e suministro di koriente di Boneiru.

Elogio i krítika

Por skucha ambos elogio i krítika ora ta trata e eskfuersonan di WEB. Bou di residente por skucha hopi elogio pa e empleadonan ku, ora ta neseario, ta traha dia i anochi pa resolvé un interupshon di koriente na e isla. 

Di otro banda tambe ta skucha krítiki, spesialmente den direkshon di gerensia. Esaki pa motibu ku no ta promé biaha ku ta primintí estudio i análisis despues di interupshon di koriente, pero despues no ta komuniká nada mas tokante e estudionan aki, òf kiko realmente a konkluí for di esakinan.