WILLEMSTAD – Ayera mainta a sekuestrá un empresario for di su tienda di ünifòrm na Veerisweg. Esei a sosodé den presensia di klientenan i personal. Tres hòmber ku máskara i fuertemente harmá, a drenta e tienda alrededor di mitar di djesun di mainta, a trata e empresario brutu i a fòrs’é drenta un Kia Rio koló kòrá. Nan a kore bai direkshon di Helmin Magno Wiels Bulevar.

Mésora despues di e sekuestro polis a start un investigashon ámplio. Agentenan ku a yega rápido na e sitio, a kompilá deklarashon di testigunnan i a analisá imágennan di kámara den besindario. Esfuersonan pa tuma kontakto telefóniko ku e empresario sekuestrá no a duna resultado. 

Mas lat ayera a bira konosí ku e sekuestradónan a eksihí un suma di reskate di 200.000 florin pa laga e empresario bai. Ounke polis no a konfirmá e informashon aki ofisialmente, ta suponé ku lo a paga e sèn di reskate.

E tim di reshèrshi ta pidi testigunan ku den kareda di e orario di e sekuestro por a mira algu sospechoso den área di Veeris òf otro kaminda, pa tuma kontakto ku polis na 917 òf, pa tep anónimo,  na 108