Antilliaans Dagblad ta skirbi riba página 4:  Tim di mantenementu di delitonan di medio ambiente

Promé minister di Kòrsou, Gilmar ‘Pik” Pisas, a lanta un tim pa kombatí delitonan di medio ambiente. E tim aki, konsistiendo di miembronanan (para)militar di Kòrsou, lo patruyá pa atendé ku lugánan di depositá sushi ilegal i kontaminashon den áreanan di naturalesa i riba laman.

Lantamentu di e tim aki ta un reakshon riba e polushon kresiente di medio ambiente i e tantísimo kehonan. E tim ta haña vehíkulonan spesial ku teknologia moderno pa ehersé nan trabou mas efisiente.

Apesar di e esfuersonan di e departamentu di medio ambiente pa hasi kontrolnan, e kontaminashon di medio ambiente riba tera i den laman a sali for di man i ta fuente di hopi keho serka e Servisio di Medio ambiente

Miembronan (para)militar di Kòrsou ku tin eksperensia den mantenementu di órden públiko  ta bai forma parti di e tim di mantenementu ku a insituí. Den transkurso di aña lo ámplia e ekipo ku mas miembro i lo tin vehíkulonan spesial ekipá ku teknologianan moderno na nan disposishon pa por hasi e trabou di kontrol i buskamentu mas efisiente.

Loke no ta pará den e korant ta ku no tin un base di lei ku ta aplikabel ainda.

Ounke e inisiativa parse hopi prometedor, tin falta di klaridat riba e base hurídiko pa por mantené e reglanan kontra dùmpmentu di sushi ilegal.

Remarkabel ta ku na momento di transishon di teritorio insular Kòrsou pa Pais Kòrsou, no a bai ku e ordenansa di residuo. Pa e motibu ei no tin lei di residuo spesífiko riba e isla.

E aktual Ordenansa Sentral órden públiko ta kontené algun artíkulo tokante dùmpmentu di sushi riba kaminda públiko, pero esakinan no ta sufisiente pa aktua efektivo kontra kontaminashon di medio ambiente mas ámplio riba e isla.

Mientras e tim nobo ta hasi nan esfuerso pa kombatí delitonan di medio ambiente, e pregunta ta keda kon efektivo nan lo por ta sin un base legal fuerte. Gobièrnu di Kòrsou lo mester konsiderá pa ahustá e lei òf introdusí leinan nobo pa hasi e inisiativa aki eksitoso i protehá e medio ambiente di e isla.

Den Èxtra: Bòrchinan di tráfiko nobo na Willemstad ta prohibí ‘U-turns’: teksto den dos idioma 

Outomobilistanan na Willemstad lo ripará ku a agregá tekstonan nobo bou di bòrchinan di tráfiko ku ta prohibí ‘U-turns’. E bòrchinan aki, ku awor ta kontené spesífikamente e tekstonan ‘No U-turn’ i ‘No girar en U’, ta un inisiativa di Servisio di Obranan Públiko (OW).

E meta di e tekstonan na dos idioma, tantu na Ingles komo na Spañó, ta pa hasi e shofùrnan mas konsiente kiko e bòrchinan ta nifiká.

E inisiativa aki ta konsekuensia di e nesesidat pa oumentá seguridat den tráfiko i redusí konfushon bou di shofùrnan. Ofresiendo e instrukshon na dos idioma, Servisio di Obranan Públiko ta trata di alkansá un kantidat mas ámplio di outomobilista i ta pèrkurá ku ta komprondé e reglanan di tráfiko mihó.

Antilliaans Dagblad ta habri e korant ku un artíkulo di Ennia bou di e kabes: Solushon aktual ‘superior’ 

I esei ta trata reservashon di trinta mion pa aña pa trinta aña largu na Ennia, di manera ku no mester hasi deskuento riba polisanan di Ennia Caribe Leven.

Antilliaans Dagblad ta lesa esaki den e dokumentonan relashoná ku e Nota di Kambio riba Presupuesto di Pais 2024 di Kòrsou, manera gobièrnu a presentá e siman aki na Parlamentu.

Gobièrnu ta konsiderá su solushon komo superior na un fiansa di Hulanda.

Pero Kuerpo di Konseho ta mustra riba e riesgonan di un inyekshon di kapital anual di trinta mion florin pa maksimalmente trinta aña. E Kuerpo ta konsehá pa duna mas detaye di e solushon i e riesgonan mará na dje pa Kaha di Gobièrnu, ku futuro gobièrnunan lo haña nan enfrentá kuné.

Aparte di esei gobièrnu ta fèrwagt ku e prosedimento sivil kontra e doño Merikano di Ennia, Hushang Ansary, i e eks-direktornan  ‘lo kontinuá i un verdedikto positivo  lo kondusí na un entrada signifikativo pa kaha di Ennia’. Esei no ta inkluí ainda den e solushon di gobièrnu. E  ta pensa ku tin un chèns rasonabel ku lo kobra e demanda (parsialmente).

Na di dos lugá Pisas ta pensa ku realisashon di e balor di Mullet Bay na Sint Maarten tambe por pèrkurá pa entrada den kaha pa Ennia. “E nivel di e realisashon ta dependé di e plannan pa Mullet Bay. E espektativa ta ku un Mullet Bay desaroyá lo produsí mas ku e balor di buki ku tin awor di 180 mion florin.”

Den Extra: Ayera tabatin re-inougurashon  di ekspanshon di e planta di serbes Montana 

Ayera serbes Montana, un marka konosí di serbes di Kòrsou, a re-aperturá nan fábrika ámplio i renová. Esaki ta marka e di 17 aniversario di e empresa i 10 aña di produkshon di serbes riba e isla. E ekspanshon lo pèrkurá pa mas kupo di trabou lokal den diferente sektor. Organisashonnan lokal i ministernan a enfatisá e importansia di e fábrika pa ekonomia lokal i pa oportunidat pa trabou. Tambe e fabrika tin planiá pa kuminsá pronto ku eksportashon pa diferente pais.

Den  Vigilante: “Taksi klandestino ta bai ku tur pertenensia di turistanan” 

Polis i Politur mester a bai entrada di Riffort na Otrabanda pa motibu di un famia di turista ku tabata bastante alterá despues ku nan a laga tur nan pertenensianan den un taksi klandestino.

E famia a skohe pa uza un taksi klandestino pa kore ku nan rònt e isla. Despues di un rekorido e shofùr di taksi klandestino a laga e turistanan atras den e área di Otrabanda i seguidamente a bai.

Despues ku nan a baha for di e vehíkulo ku no ta registrá komo taksi, e turistanan a realisá ku tur nan tas- i pertenensianan tabata den e vehíkulo ainda. Nan a yama polis mésora.

Politur i polis a bai e sitio pa start un investigashon i a purba via di imáhennan di kámara pa identifiká e vehíkulo i pa asina aserká e shofùr di taksi klandestino.