WILLEMSTAD – For di aña 2017, e aña ku a eliminá e kuponan di minister pa estudio di medisina na Hulanda, e islanan Karibense ta mira un bahada signifikante den e kantidat di studiante ku ta studia medisina. E kuponan aki tabata ofresé posibilidat na djes studiante di e islanan pa sigui un estudio  médiko riba nivel HBO òf universitario na Hulanda. E konosido epidemiólogo Izzy Ferstenbluth ta menshoná diferente motibu pa e bahada aki den un artíkulo di Caribisch Netwerk.

Kuponan di minister den e konteksto di e estudio médiko na Hulanda ta referí na un kantidat spesial di kuponan pa estudio ku e minister di Enseñansa, Kultura i Siensia ta otorgá. E kuponan aki ta pa kandidatonan ku pa motibunan eksepshonal ta haña un trato preferensial na momento di atmishon pa e estudio di medisina.

Segun Gerstenbluth un di e motibunan mas importante pa e bahada ta e falta di strategianan di planifikashon pa salubridat kla definí riba e islanan. “Nos mester sa eksaktamente kiko e nesesidat ta riba e isla. Esaki ta eksigí análisis di dato i tradusí na maneho di gobièrnu.” Gerstenbluth ta bisa.

Futuro  

Hopi persona ta mira reintrodukshon di e kuponan di minister komo un posibel solushon pa oumentá e kantidat di studiante médiko di e islanan. Ministernan plenipotensiario di e islanan ta enfatisá e importansia di tal kuponan, pero ke e garantia tambe ku e studiantenan ta regresá e islanan despues di nan estudio.

Naomi Juliana a finalisá su estudio kaba komo dòkter. “Mi no por a bai studia medisina mésora”, Juliana ku ta prosedente di Kòrsou ta bisa. Tumaini Pinedo ta prosedente di Kòrsou i ta den su di dos aña di siensia biomédiko na Maastricht. E ta krítiko. “Tin biaha mester por atmití studiantenan ku un seis tambe pa un estudio médiko,” e ta haña.

Jayrón Heemstadt ta di Aruba i ta traha komo enfermero. E ta positivo tokante e kuponan di minister ku tabata eksistí ainda durante su estudio. “Personalmente esei a yudami hopi.”

Gerstenbluth ta mira tantu bentaha komo desbentaha den reintrodukshon di e kuponan di minister i ta enfatisá ku mester ta bon kla kiko ta nesesario riba e islanan. “Bo mester por fèrwagt di un gobièrnu ku nan sa ken mester prepará,” e ta konkluí.