KRALENDIJK – Dia 25 di yanüari Tourism Corporation Bonaire (TCB) a partisipá na Travmedia’s International Media Marketplace 2024 (IMM) na New York City. IMM ta e prestigioso evento di ret na nivel mundial ku ta konektá e industria di biahe ku e mihó periodistanan, redaktornan, influencer-nan i presentadónan di radio i televishon.

Den kolaborashon ku Diamond PR (Boneiru su ofisina di relashonnan públiko), TCB a partisipá e aña akí na e evento akí. Boneiru su enfoke tabata riba personalisashon di e eksperensia Boneiru, laga mira kiko ta nobo pa 2024 i pone énfasis riba e maravianan kultural i históriko di nos isla. Ku éksito TCB tabatin mas ku 20 sita individual ku kolaboradónan renombrá di ‘outlets’ manera USA Today 10Best, Lonely Planet, Travel + Leisure, BBC Travel, Forbes i mas. Kada partner di medionan di komunikashon a risibí un pòstkart di Boneiru spesialmente desiñá, i ku vários amigu boneriano a skirbi na man, manera Izaïn Mercera di Parke Kultural Mangazina di Rei, Elton ‘Taty’ Frans di The Frans Paradise, Elizabeth Kelkboom di Henk Transport and Tours, Shaquil Boezem di Bonaire Landsailing Adventures, i Elise Arrindell-Weerstand di Sweeti Bakery i Blue Lagun Café Bonaire, djis pa menshoná algun.

TCB i partnernan lokal ta preparando nan mes tambe pa partisipá e wikènt akí na e Travel & Adventure Show na New York. Seis partner lo ‘showcase’ nos isla na e bolsa den e stènt di Boneiru. E show ta tuma lugá 27 i 28 di yanüari 2024 den Jacob K. Javits Convention Center.