KRALENDIJK- Diputado Clark Abraham a bishitá ofisina di Registro Sivil (Burgerzaken) riba djaweps pa diskutí posibilidatnan pa mehorá servisio na residentenan di e isla.

Durante e bishita, Abraham a enfatisá e dedikashon i kompromiso di e personal. “Pa hopi tempu tabata tin muchu tiki atenshon pa kehonan di empleadonan tokante problemanan ku mester keda solushoná. E tempu largu di espera na e departamentu definitivamente no ta debí na falta di esfuerso di e empleadonan.”

Abraham a yega di bisa na mas okashon ku Kolegio Ehekutivo ta konsiente ku e servisio mester wòrdu yega na un nivel mas haltu, pero a mustra tambe ku e problemanan a kumulá durante e añanan. “P’esaki, lo tuma algun tempu promé ku e problemanan i retraso den servisio wòrdu resolvé,” Abraham a bisa. E diputado a yega di indiká tambe ku mester invertí den mihó hèrmènt pa ehekutá e trabounan.  

Diskulpa

Durante su bishita, Abraham a ofresé un diskulpa na ámbos e empleadonan di e servisio, komo na e públiko general. “Kehonan pa muchu tempu no a wòrdu tumá na serio. Esei mester mehorá awor.” E diputado a primintí tambe ku pronto lo tin otro enkuentro ku e departamentu pa sigui papia tokante e solushonnan.