Kralendijk- E organisashon pa konsumidó Unkobon ta bisa ku nan a yega na konklushon ku Boneiru mes lo no por kaba di atende e reto di drecha situashon di e kamindanan kibrá na Boneiru.

“Dos aña pasá diputado Kroon a anunsiá ku den un tèrmino kòrtiku lo kuminsá mira desaroyo en torno e kareteranan di Boneiru. Ta tin un plan di ehekushon kla i Hulanda lo a finansiá esaki. E plan di ehekushon 2019 – 2023 tabata menshoná renobashon di 27 kilometer di kaya, dividí den 38 diferente pida”.

Segun informashon di Unkobon, gastu total di e proyekto aki lo tabata $18.5 mion, kaminda Hulanda a transferí den 2019 un montante di $ 6.3 mion pa esaki. Dos aña despues por nota ku solamente tres pida kaya di e plan a keda ehekutá. Un total di mas o menos un kilometer. Konforme e presupuesto ni $ 450 mil. Segun e plan a sobra 26 kilometer ainda pa ehekutá.

Mas kaminda?

Unkobon tambe ta mustra riba e echo ku, resientemente, OLB a anunsiá ku lo bai añadí mas kaya ku lo bai wòrdu renobá den e periodo te ku 2023.

“Pero en bes di mas lo bai ehekutá den e periodo te ku 2023 solamente 13 di e 38 pida kaya manera planeá anteriormente plus dos pida kaya nobo ku no tabata menshoná den e plan. Ku otro palabra no e 27 kilometer planeá sino solamente 11 kilometer asfalt. Komunikashon en torno ehekushon di e kayanan ta inkompleto i inkonfiabel. Esaki ta dañiño pa no solamente e diputado responsabel pero tambe pa e Kolegio Ehekutivo den su totalidat”, asina Unobon ta skibi.

Asombro

Segun Unkobon e konfushon tokante hinter e problemátika di drechamentu di kaminda a bira mas grandi, na momentu ku a informá pueblo ku mester bin sen for di Hulanda promé ku por kontinuá ku ehekushon di e plan. “Serka e komunidat Boneriano esaki a kousa asombro i duda komo tal e deklarashon a wòrdu retirá”.

Unkobon ta mustra ku na tur Boneiru tin 212 kilometer kaminda asfaltá, di kual kasi tur ta den mal kondishon. Banda di esei tin 130 kilometer kamind’i tera. Tambe, den barionan nobo hopi kaya no ta asfaltá. “OLB ta presentá awó un plan unda ta ilustrá ku pa aña 2023 un total di 11 kilometer lo ta renobá. Komunidat Boneriano lo keda humilde i semper kontentu ku esaki? Kuantu mas Konseho Insular tin aseptá e demostrashon di inkapasidat aki? Boneiru so no por!’, asina Unkobon ta skbi.

Segun Unkobon ya ta mas u kla ku renobashon di e kayanan na Boneiru, ku ta un proyekto di 250 miyon dollar, ta demasiado grandi pa un munisipio chikí ku Boneiru ta. “Pa años kaba Unkobon ta tratando di konvensé e mandatarionan di turno ku Boneiru su so no por. E solushon tei. Tin laga Hulanda, unda tin e material nesesario, e konosementu i e finansas, ehekutá e proyekto aki. Pueblo di Boneiru meresé esaki”, asina Unkobon a klousurá.