DEN HAAG – E revisishon di e relashonnan atministrativo i finansiero ku Hulanda Karibense ta pidi mas ku un par di adaptashonnan tékniko. E adaptashonnan ku a proponé den e finansiero aktual di e tareanan i rekursonan insular di Hulanda Karibense ta keda den un patron di ofresé solushonnan den un sistema ku tin defisiensianan fundamental.

Esei ta loke Raad voor het Openbaar Bestuur (ROB) ta bisa den e rapòrt ‘Studie eilandelijke taken en middelen Caribisch Nederland’ a base di e investigashon ku ofisina IdeeVersa a ehekutá riba enkargo di Ministerio di Asuntunan Interno i Relashonnan den Reino.

Entre otro, ROB ta konsehá ku responsabilidat propio di e islanan mester ser promové, tin ku tuma mas kuenta ku e posishon speshal di e tres islanan, e finansiamentu mester ta otro, i mester perkurá pa yega nan un aliniamentu atministrativo i finansiero mas uniforme.

No ta promé biaha ku e konseho ta boga pa un ròl mas aktivo pa Ministerio di Asuntunan Interno i Asuntunan Reino. Den práktika, e papel ei a resultá relativamente difísil, ku konsekuensia ku e islanan ta haña nan mes ku un batayón na ministerionan ku kua nan tin ku mantené relashon.  

Rason

E rapòrt na sierto modo por wòrdu konsiderá ku a duna rason na gobièrnunan di Boneiru, St. Eustatius i Saba, ku kasi for di 10/10/10 ta indikando ku e manera ku kosnan ta kanando te asina leu, no ta esun di mas optimal.  Tin hopi krítika riba e nivel di e ‘vrije uitkering’, di kual ta bisa ku e ta muchu abou pa hasi tur kos kuné pa kua gobèrnunan insular ta responsabel. E rapòrt ta bisa ku na lugá di duna kada bes finansiamentu pa sierto proyekto, mester tin finansiamentu struktural tambe pa mantené e proyektonan.