KRALENDIJK – PROCOLOMBIA i Tourism Corporation Bonaire a firma un Memorandum di Entendimentu (MOU), ku e meta pa reforsá kolaborashon den promoshon di turismo entre Kòlombia i Boneiru.

PROCOLOMBIA ta entre otro responsabel pa promoshon di ekspòrtashon no-tradishonal, atrakshon di invertimentu for di eksterior i promoshon di turismo na Kòlombia.

E MOU ta enfatisá kolaborashon riba inisiativanan manera promové konekshonnan aéreo, identifiká oportunidatnan di ekspòrtashon i invertimentu, ofresé asistensia tékniko, kambia práktikanan bon, kompartí informashon i partisipá den aktividatnan turístiko relevante.

E kolaborashon ta marka un paso importante pa stimulá turismo i presentá Kòlombia komo un entrada estratègiko pa Sur Amérika, ku ta aumentá e atraktividat di tur dos destinashonnan pa biaheronan internashonal.

Entusiasmá

“Nos ta entusiasmá tokante e oportunitatnan ku e kolaborashon aki ku PROCOLOMBIA ta presentá. Pa medio di trahamentu huntu, nos por mehorá e promoshon di nos destinashonnan i invertí huntu pa realisá konekshonnan aéreo direkto entre Kolombia i Boneiru,” asina direkto di TCB, Miles Mercera, a bisa. 

Carmen Caballero, presidente di PROCOLOMBIA, tambe ta kontentu ku e akuerdo. “Boneiru ta rekonosé e importansia di Kòlombia komo un porta di entrada stratégiko pa Sur Amérika, i nos ta studia aktivamente e posibilidatnan pa realisá konekshonnan direkto entre nos paisnan”.