KRALENDIJK- E diskushon tokante e impakto i di kantidat grandi di pasaheronan di krusero no ta algo nobo, òf úniko pa Boneiru. Djies despues di e pandemia di COVID-19, e kolegio ehekutivo formá pa MPB i UPB a sugerí pa limitá e kantidat di barku krusero te unu pa dia. 

E koalishon di PDB/M21/Vrolijk, despues di a sinta, a mustra su mes mas inkliná pa wak e kantidat di pasahero enbes di e kantidat di barku. 

Despues di e komentarionan inisial, no a tende hopi mas di Gobièrnu aktual pa loke ta trata e topiko aki. E resistensia kontra un ekseso di turismo kausá pa pasaheronan di barkunan krusero no ta úniko pa Boneiru, pero ta algu ku ta mirando di forma kresiente rònt mundo. 

Diferente destinashon popular bou di barkunan krusero ta investigando aktualmente na ki manera lo por frena òf limitá e impakto di turismo krusero. 

Na Alaska, dos destinashon hopi popular pa loke ta trata turismo di krusero, inkluso e siuidat di Juneau, ta tumanado akshonnan konkreto pa trata na evitá e kongestión kausá pa turismo di barkunan di pasehero. 

E siudat ta negoshiando aktualmente ku kompanianan di krusero pa establesé un límite di pasaheronan, siguiendo un rekert di no ménos ku 1.6 mion bishitante den e temporada haltu aña pasá. 

Ounke kantidatnan spesífiko ainda mester wordu fihá, e siudat i e Asosiashon Internasional di Lineanan di Krusero (CLIA) a yega nan un akuerdo tentativo ku Juneau pa limitá e kantidat di barkunan te na un máksimo di sinku pa dia pa 2024. 

Alix Pierce, hefe di turismo di Juneau, ta enfatisá e importansia di e akuerdo preliminario aki komo un paso den e bon direkshon. Diskushonnan andando ta inkluí topikonan manera “hot berthing” i maneranan pa evitá di e kongestión den sentro di siudat pa mehorá e eksperiensia di bishitantenan, i kalidat di bida di e habitantenan. 

Tendensia ámplio

E inisiativa di Juneau ta parti di un tendensia mas ámplio entre siudatnan na Alaska, ku ta inkluí Sitka i Bar Harbor, na estado di Maine, Merka, tambe ta luchando pa manehá turismo di krusero i pa preservá nan karakter i kalidat di bida úniko. 

Sitka ta tratando di limitá e kapasidat di pasaheronan te na 240.000 pa aña, mientras ku Bar Harbor ta luchando pa limitá e kantidat di pasaheronan ku por baha di barku te 1.000 persona pa dia. 

Rèkert

Pa 2024, Boneiru ta na kaminda pa establesé un rèkert apsoluto den kantidat di turista  krusero, ku mas di 400.000 bishitante, mas ku kalke otro aña den historia. Ounke por skucha algun bos na Boneiru ku lo ke organisá un referèndum tokante e topiko, tòg no por nota muchu entusiasmo ainda bou di e habitantenan di e isla.

“Hot berthing” ta referí na e práktika kaminda un barku di krusero ta mara solamente pa algun ora, pa despues wòrdu remplasá direktamente pa un otro barku krusero, pa asina usa espacio posibel di manera mas efisiente posibel.