Kralendijk, The Bottom, Saba, Oranjestad, St. Eustatius – E poblashon laboral aktivo na Hulanda Karibense apénas a krese den 2020 kompará ku 2018. Solamente e poblashon laboral aktivo na Boneiru a krese un tiki den e dos añanan ei, na Sint Eustatius i Saba e kantidat di trahadó a baha levemente. Esaki ta sali na kla for di e investigashon resien di forsa laboral Hulanda Karibense di CBS.

Ta tene e investigashon di forsa laboral Hulanda Karibense (AKO-CN), for di unda e sifranan di e kantidat di trahadó ta prosedente, kada dos aña entre òktober i desèmber. E investigashon di 2020 no por a tuma lugá mas promé ku entre desèmber 2020 i mart 2021, pa motibu di e medidanan di corona. No por atribuí desaroyo den e sifranan konkretamente na e krísis di corona, kambionan por a tuma lugá tambe mas tempran kaba.

E medidanan ku a drenta na vigor medio mart 2020 pa pone un paro na plamamentu di e vírùs di corona, a sòru pa entre otro seramentu di espasio aéreo di e islanan, i tambe tráfiko krusero a para. Pa e motibu aki turismo for di eksterior tabata kompletamente paralisá. Habitantenan di e islanan ainda por a move liber si riba e isla. Na momentu ku a ehekutá AKO-CN 2020, tabata posibel atrobe pa bai e islanan ku avion, pero ainda no ku barku krusero. Pa empleado- i kompanianan riba e islanan ku a keda afektá pa e medidanan di restrikshon, gobièrnu hulandes a pone paketenan di sosten finansiero na disposishon.

Kresementu leve poblashon laboral aktivo na Boneiru

Na Boneiru tabatin 11,5 mil persona laborando den 2020, algu mas ku den 2018 (11,2 mil). Komo ku e poblashon riba e isla a oumentá mas komo konsekuensia di un saldo di migrashon positivo, e partisipashon laboral a baha di 73,1 porshento (2018) pa 69,8 porshento (2020). Na Sint Eustatius mas di 1,7 mil persona tabatin trabou pagá i na Saba mas di 1,1 mil. Esaki ta nifiká un partisipashon laboral di respektivamente 71,0 porshento i 73,4 porshento. Na Sint Eustatius e kantidat di trahadó ta 8 porshento mas abou ku den 2018, na Saba 3 porshento. Splikashon pa un parti di e bahada di e kantidat di trahadó ta pa motibu di limpiesa di e atministrashon di poblashon riba e islanan aki, di manera ku a hasi ahuste ku a resultá den bahada di e sifranan di poblashon.

Boneiru: ménos trahadó den transporte i almasenamentu i kultura, deporte i rekreo

Den algun ramo di empresa na Boneiru e kantidat di trahadó a bai atras kompará ku 2018. E kantidat mas grandi a disparsé den ramo di transporte i almasenamentu (–240), siguí pa demas servisio (–190) i kultura, deporte i rekreo (–150). Profeshonnan relatá na transporte di turista, guia turístiko i instruktor di buseo por ehèmpel a kai afó. Kompará ku 2018 banda di eseinan ademas e kantidat di trahadó den atministrashon públiko i salubridat tambe a bira ménos.

E partisipashon di trahadónan den informashon i komunikashon a dòbel (+190) desde 2018 te mas di 3 porshento di tur trahadó. Tambe den hürmentu i demas servisionan komersial, hóreka, konstrukshon i enseñansa a bin un kantidat grandi di trahadó aserka. Pa e motibu aki hóreka i konstrukshon, a surpasá atministrashon públiko na Boneiru komo sektornan empresarial ku mayoria trahadó. Den hóreka partikularmente a bin mas trahadó aserka ku ta traha riba nan mes. E kresementu den konstrukshon ta trata kasi totalmente di trahadó prosedente di Sentroamérika i Suramérika. E kantidat di trahadó lokal (nasé riba un di e islanan di anterior Antia Hulandes) den konstrukshon a bai atras.

Sint Eustatius: partikularmente ménos trahadó den transporte i almasenamentu i industria

Na Sint Eustatius partikularmente e kantidat di trahadó den e sektornan empresarial transporte i almasenamentu (-60) i industria (-50) a bira ménos kompará ku 2018. Ta trata partikularmente di ménos kontrato temporal. Den e sektor transporte i almasenamentu kontrali na Boneiru no ta trata di ménos aktividat komersial relatá na transporte di turista, pero di ménos kapasidat di almasenamentu relatá na e terminal di almasenamentu di zeta. E terminal aki ta sòru pa un gran parti di empleo riba e isla i for di 2019 ta den man di un propietario nobo. Pa kultura, deporte i rekreo, demas servisio i hóreka, e kantidat di trahadó huntu tambe ta sali abou (–60). Atministrashon públiko na Sint Eustatius a keda e sektor mas grandi riba e isla, ku 20 porshento di trahadó. Kompará ku 2018 esaki a subi un tiki mas.

Saba: atministrashon públiko ta keda sektor empresarial ku mas trahadó

Na Saba den e sektornan empresarial relatá na turismo, manera hóreka i kultura, deporte i rekreo, kasi no tabatin modifikashon den kantidat di trahadó kompará ku 2018. Den industria a bin algun trahadó aserka i e kantidat di trahadó den komersio a resultá mas abou. Atministrashon públiko ta keda e dunadó di trabou di mas grandi na Saba, siguí pa enseñansa, debí na e universidat médiko riba e isla.

Fuentenan:
StatLine – Caribisch Nederland; arbeidsdeelname, kerncijfers

http://opendata.cbs.nl/statline/#/CBS/nl/dataset/83165NED

StatLine – Caribisch Nederland; werkzame beroepsbevolking, bedrijf (SBI 2008)http://opendata.cbs.nl/statline/#/CBS/nl/dataset/83169NED

---

Lesa tambe:

• 
  Partnernan di CAO pa Islanan BES a topa pa deliberá riba desaroyo 
• 
  Prevení Zika, Dengue i Chikungunya
• 
  Organisashonnan Karibe Hulandes ta traha huntu pa preveni violensia kontra hende muhé
• 
  Sindikalismo na Boneiru parti 47, 25 di novèmber 2024
• 
  Curoil ta hasi su mes kulpabel na komportamentu sin rèspèt, pero gobièrnu ta tolerá esei