Kralendijk – Dentro di poko Boneiru ta distinguí kuater nivel di riesgo pa biaheronan ku ta bini e isla ku avion òf boto. E isla ta distinguí pais ku un nivel di riesgo hopi abou, abou, haltu i hopi haltu. Ta hasi distinshon tambe entre biahero ku ta kompletamente bakuná i biahero ku no ta kompletamente bakuná. E distinshon den kuater nivel di riesgo ta drenta na vigor for di djasabra 17 di yüli 2021, dentro di poko ta anunsiá e lista di pais di riesgo. For di 17 di yüli 2021 biaheronan for di 12 aña bai ariba ta obligá pa hasi tèst. Tur biahero pa Boneiru mester yena un Deklarashon di Salú entre 48 i 72 ora promé ku salida riba www.bonairecrisis.com.

Riesgo hopi abou

Biaheronan ku a bakuná i biaheronan ku no a bakuná for di paisnan ku riesgo hopi abou no tin mester di hasi tèst.

Riesgo abou

Biaheronan ku a bakuná for di paisnan ku riesgo abou no tin mester di hasi tèst. Biaheronan ku no a bakuná for di paisnan ku riesgo abou mester hasi un tèst di PCR dentro di 72 ora promé ku yegada na Boneiru, e resultado mester ta negativo.

Riesgo haltu

Biaheronan ku a bakuná for di paisnan ku riesgo haltu mester hasi un tèst di PCR dentro di 72 ora promé ku yegada. Biaheronan ku no a bakuná mester hasi un tèst di PCR dentro di 72 ora promé ku yegada i un tèst antigéniko na yegada na Aeropuerto Flamingo. Si hasi e tèst di PCR 24 ora promé ku salida, e ora ei ta anulá e obligashon pa hasi e tèst antigéniko na yegada.

Riesgo hopi haltu

Biaheronan ku a bakuná for di paisnan ku riesgo hopi haltu mester hasi un tèst di PCR dentro di 72 ora promé ku yegada. Biaheronan ku no a bakuná for di paisnan ku riesgo hopi haltu mester hasi e tèst di PCR dentro di 72 ora promé ku salida i e tèst antigéniko na yegada na Aeropuerto Flamingo. Si hasi e tèst di PCR 24 ora promé ku salida, e ora ei ta anulá e obligashon pa hasi e tèst antigéniko na yegada. Tur biahero ku a bakuná i biahero ku no a bakuná for di paisnan ku riesgo hopi haltu mester hasi un tèst di PCR grátis riba e di 5 dia despues di nan yegada.

Biaha ku boto

Pa biaheronan ku ta biaha ku boto pa Boneiru ta difísil pa hasi un tèst di PCR 72 ora promé ku yegada. Nan tin mag di hasi e tèst 72 ora promé ku salida, i un tèst antigéniko na yegada na e isla. 

---

Lesa tambe:

• 
  Partnernan di CAO pa Islanan BES a topa pa deliberá riba desaroyo 
• 
  Prevení Zika, Dengue i Chikungunya
• 
  Organisashonnan Karibe Hulandes ta traha huntu pa preveni violensia kontra hende muhé
• 
  Sindikalismo na Boneiru parti 47, 25 di novèmber 2024
• 
  Curoil ta hasi su mes kulpabel na komportamentu sin rèspèt, pero gobièrnu ta tolerá esei