Kralendijk – Habitantenan ful bakuná di e islanan ABC no tin mester di hasi tèst di PCR òf tèst antígino ora nan ta biaha entre e islanan.

E biaheronan akí mester yena e deklarashon di salú sí di nan destinashon. Abitantenan di islanan ABC ku no ta bakuná ku ta biahe entre e islanan akí, mester hasi un tèst di PCR denter 72 ora promé ku yegada na Boneiru. Nan mester yena e deklarashon di salú di nan destinashon tambe.

Nivel di riesgo

Entrante djasabra 17 di yüli 2021, Boneiru ta distinguí kuater nivel di riesgo pa paisnan. Departamento di Salubridat Públiko i Gezaghèber ta tene e kantidat di kaso di hende ku a pega ku e virus bon na bista na Boneiru i na e islanan ruman.

Si mester, lo adaptá e kondishonnan di biahe pa biahero den e bùbel. Pero esaki no ta e kaso awor. Ta konsiderá Sint Maarten sí komo un pais di riesgo haltu.