Kralendijk- Frakshon Coffie di miembro di Konseho Insular, Daisy Coffie, ta ekspresá su preokupashon pa loke ta trata e situashon sosial na Boneiru.

Segun Coffie, pa añanan hopi esfuerso ta ser hasí pa stipulá un eksistensia mínimo pa Boneiru, basá riba un kantidat di rapòrt di investigashonnan sientífiko ku a hasi riba e situashon di pobresa riba nos isla. “Tur ta yega na e mesun konklushon, esta ku e entrada di nos hendenan ku ta risibí ònderstant i penshun di behes no ta alkansá pa kubri e gastunan básiko di tur luna ku ta entre otro paga hür di kas, paga awa, koriente, internèt i telefòn, transporte públiko, gastunan pa yu (kinderbijslag) i kuminda”.

Coffie ta mustra tambe riba e echo ku den Diálogo Sentral, partidonan -esta gobièrnu, organisashon di dunadónan di trabou i organisashonnan di e klase trahadó- a yega na un akuerdo pa subi suèldu mínimo i kuné subi e “uitkeringen” manera ònderstant, penshun di behes i “kinderbijslag” na un nivel mas desente.

Subida

“Entre tantu apesar di tur e esfuersonan aki, nos por tuma nota ku tur produkto na pòmp­nan di gasolin a subi, inkluso gas pa kushiná, i a anunsiá ku ta bai subi hür di kasnan di fundashon i awor a anunsiá ku a subi koriente basta pisá”, segun Coffie ta nota. Coffie ta mustra tambe riba e echo ku ya a anunsiá ku e supsidio ku Hulanda tabata duna WEB lo no t’ei mas na yanüari 2022 ku e konsekuensia ku na yanüari 2022 koriente probablemente lo sigui subi. Tambe lo stòp ku e supsidio ku gobièrnu Hulandes tabata duna tur usuario pa ku “vastrecht” di koriente i awa i tambe e US$25 pa internèt.

“Mi ta hopi preokupá pa e situashon ku ta pinta nos dilanti i mi ta di opinion ku gobièrnu di Boneiru mester por presentá un plan kon ta bai atendé ku e gruponan vulnerabel den nos komunidat pa nan por wanta e gòlpi ku ta na kaminda”

Perspektiva

Coffie ta mustra riba e echo ku Boneiru a bira parti di Hulanda i komo tal no mester tin diskushon kiko ta un nivel di bida akseptabel den Hulanda. “Por hasi diferensiashon pero esaki semper mester ta na benefisio di Boneiru. Pa tal rason mi ta bolbe ripití loke mi a splika Eerste Kamer. Ta un echo ku e espektativanan ku a krea pa a sostené Laso Direkto na 10-10-10 no ta e realidat ku nos ta bibando aden 11 aña despues”, asina Coffie ta bisa.