DCNA a duna un Masterklas na Parlamentarionan Hulandes tokante esfuersonan di konservashon
![DCNA a duna un Masterklas na Parlamentarionan Hulandes tokante esfuersonan di konservashon.](https://aworbonaire.nu/wp-content/uploads/sites/3/2021/07/dcna-2.png)
Kralendijk – Durante dies dia di enkuentronan ofisial Dutch Caribbean Nature Alliance (DCNA) a duna un ‘masterclass’ pa Miembronan di Parlamento hulandes, splikando e personanan presente e importansia di sostené konservashon di naturalesa na Karibe Hulandes i enfokando mas tantu riba efektonan ku kambio di klima lo tin na e islanan.
“Durante dies dia di enkuentro na Hulanda ku vários stakeholder nos a haña importante pa trese dilanti ku ainda na Hulanda tin un falta di konosementu di konservashon di naturalesa den e foko di biodiversidat den Reino Hulandes; e region di Karibe Hulandes. Pa e motibu akí un di e inisiativanan mayó ku nos a tuma ta pa organisá un ‘masterclass’ tokante Konservashon di Naturalesa na Karibe Hulandes, nos éksitonan i nos retonan, i loke ta rekirí pa oumentá e produktonan i servisionan ku Naturalesa ta proveé pa e desaroyo sosioekonómiko duradero di e islanan awor ku nos ta lantando i drentando den un realidat postpandémiko,” DCNA su Director Tadzio Bervoets ta komentá. Durante e enkuentronan a duna e personanan presente informashon tokante e status di konservashon di naturalesa na tur e seis islanan di Karibe Hulandes, e nesesidat pa inkluí tur e seis islanan di e region di Karibe Hulandes den desishonnan di Kambio di Klima ku Gobièrnu di Reino ta tuma i e nesesidat pa sostené konservashon di naturalesa na e islanan finansieramente.
“Un di e tópikonan mas notabel ku a bini dilanti durante e enkuentronan, sea ku ta ku e Ministerio di BZK, e Ministerio di Asuntu Ekonómiko i Kambio di Klima, òf ku e vários Miembronan di Parlamento di Hulanda, tabata e falta di konosementu na Hulanda di Konservashon di Naturalesa na Karibe Hulandes i kon protekshon di naturalesa lo sigurá un futuro finansiero duradero pa e islanan. Esaki ta e motibu ku tabata importante pa tene enkuentro ku e respektivo agentenan di toma di desishon, organisashonnan partner di naturalesa i institutonan di investigashon pa sigurá, ku na Hulanda, konservashon di naturalesa, Kambio di Klima i Maneho di Áreanan Protehá na Karibe Hulandes ta haña un lugá fiho riba agènda. Esaki tabata e meta mayó di loke tabata diskushonnan intenso i prolongá,” Bervoets a agregá.
Durante e enkuentronan DCNA a pidi spesífikamente pa tene kuenta ku e impaktonan di Kambio di Klima i e impaktonan riba Naturalesa, Komunidat i Ekonomianan di e komunidatnan mas vulnerabel di Reino, ku ta esunnan den e region di Karibe Hulandes, den e proseso di toma di desishon, spesífikamente ora esaki ta relatá na diskushonnan andando komo parti di e proseso di formashon di gobièrnu i pa pone e Sosten pa Naturalesa na Karibe Hulandes riba e futuro programanan di gobernashon.
Lesa tambe:
- Turismo na Boneiru ta krese 11% na ougùstùs: Hulanda ta keda e merkado mas grandi
- Kompleho Deportivo será entre 11 i 13 di sèptember
- Winair ta introdusí dos buelo pa Boneiru for di St. Maarten sin parada na Kòrsou
- Vakatura Customer Service Center Officer
- Vakatura Director of Tourism