KRALENDIJK – Mayor/tutor di alumno di skol básiko, skol sekundario òf mbo, por apliká awor pa transporte eskolar pa nan pa aña eskolar 2024-2025. E transporte ta pa mayor/tutor ku no por hiba yu skol komo ku nan no tin outo. Pa bini na remarke pa transporte eskolar, mayor/tutor por apliká na www.bonairegov.com/inwoners/schooltransport. Pa pregunta tokante transporte eskolar por app e number 790 95 95. 

Durante aña eskolar, ta pasa buska alumno òf trese alumno ku ta hasi uso di transporte eskolar na un ora fiho i na un lugá ku a palabrá ku nan. No ta pasa buska ni trese e yunan na kas ma na un lugá palabrá. Direktorado di Komunidat i Kuido ta fasilitá transporte eskolar. Ta pidi un biaha so un kontribushon di mayor/tutor. Ku e kontribushon akí e yu por hasi henter aña eskolar uso di transporte eskolar. 

Pa alumnonan ku ta biba na Playa i ku ta bai skol den un otro bario, ku eksepshon di Rincon, e kontribushon pa aña ta 24 dòler pa e di promé yu. E kontribushon pa e di dos yu ta 12 dòler i for di e di tres yu e kontribushon ta 6 dòler. Pa e ruta Playa-Rincon, Rincon-Playa, e kontribushon ta e aña akí 12 dòler pa yu, i 6 dòler pa e siguiente yunan. 

Ora nan apliká pa transporte eskolar, mayor/tutor ta haña e number di kuenta di banko kaminda nan por depositá nan kontribushon. Ora risibí e pago, e mayor/tutor ta haña un karchi di bùs pa e yu. E muchanan ku ta hasi uso di transporte eskolar mester mustra e karchi akí na e shofùr pa kada kareda.