KRALENDIJK – Partido di oposishon Movementu di Pueblo Boneriano (MPB) ta bise e man di komishonario Clark Abraham den e renunsia di Miles Mercera komo direktor di Tourism Corporation Bonaire (TCB). Esaki e partido blou a skibi den un deklarashon duna riba djaluna.

“Durente e último añanan, TCB a por konta riba un presupuesto total di un tiki mas ku 3 miyon dòler pa aña. Pa 2024, e presupuesto di TCB a bai abou ku mas ku 1 miyon dòler pa yega na 2 miyon dòler, mientras ku e gastu di personal pa 2024 a subi,” segun MPB.

Segun e partido blou, Mercera tabata advertí vários biaha pa e ‘konsekuensianan desastroso’ di e redukshon den presupuesto. MPB ta indiká tanbe ku pa motibu di esaki TCB a mester kanselá vários kontrato.

Diputado Abraham mientrastantu a desmentí, entre otro den kombersashon ku ABC Online Media, ku e presupuesto di TCB a baha. “Por añanan kaba tin 2 miyon pa TCB den e presupuesto i pa 2024 esaki no ta otro. Ta un echo ku tabata tin sierto ku fondo adishonal a bin despues di e krisis di Corona, i e fondonan adishonal no tei mas.”

Desinformashon

Abraham ta bisa ku den e fase aki e no ke papia ainda tokante nesisidat pa hisa e prospuesto di TCB den futuro si òf no. “Loke mi ta kontra di dje ta un desinformashon intensiononal pa sierto partido, i tilda nos di kos ku no ta kuadra. Ami ta papia a base di sifra i ku e presupuèsto di 2024 den mi man,” segun Abraham ta bisa.