KRALENDIJK – Entrante 23 di yüli 2024 señor Edsel Winklaar a keda nombrá komo direktor nobo na Selibon N.V. riba un base interino. Winklaar ta susesor di Rudsel Leito, ku durante e último 12 aña tabata direktor di Selibon N.V.

Segun Gerard Chin-A-Lin, presidente di hunta di komisario, despues di hopi aña di dedikashon di sr Leito a yega e momentu pa traspasá e liderazgo. “Su susesor ta un direktor ekpserensiá riba tereno di kompania di gobièrnu na Boneiru i e tin konosementu di atministrashon públiko i di nos komunidat boneriano”, asina Chin-A-Lin a bisa den un komunikado pa prensa. 

Winklaar tin entre otro mas ku 30 aña di eksperensia den organisashonnan ‘profit’ i ‘non profit’, i e tabata enbolbí ku konseho stratégiko riba proyektonan grandi, análisis di organisashon i maneho di kambio. Den pasado el a traha entre otro komo hefe di departamento di realisashon na Direktorado di Planifikashon i Desaroyo, komo mènedjer di e unidat komersial di WEB N.V. i komo direktor general di Telbo N.V. 

Tambe Winklaar pa algun tempu a fungi komo diputado i komo miembro di Konseho Insular di Boneiru. 

Traha brùg

“Den señor Winklaar nos ta mira un aktitut ku enfoke riba resultado, pero prinsipalmente ku enfoke riba hende i ku kaminda ta nesesario sa kon pa traha brùg. Nos ta pensa ku e por duna un aporte na solushon di e hopi desafionan ku Selibon N.V. ta konfrontá. E ta un estratega ku konosementu i forsa di ehekushon ku den un forma eksitoso por duna guia na kambio. Tur esaki ku e meta pa mantené Boneiru limpi i habitabel, i pa duna un aporte positivo na konservashon di medio ambiente i naturalesa” segun e deklarason ku Selibon a saka djaweps atardi.