KRALENDIJK- Kolegio ehekutivo di Boneiru tin su preokupashonan pa loke tata trata e desaroyonan ku ta tumando lugá na Selibon. Esaki a keda ekspresá pa diputadó Clark Abraham durante un konferensia di prensa djabièrnè atardi. 

E preokupashon di e BC ta konserní diferente asuntu, manera maneho na e kompania , pero tambe e asuntu di ken lo paga pa e gastunan despues di e kandela grandi ku tabata tin na lèntfil algun siman pasá. 

“Nos ta komprondé ku e señor Leito a wordu remplasá pa un direktor interino. Pero nos tabatin un akuerdo ku Bonaire Holding Maatschappij ku tabata bai nombra un gerensia di dos persona; un direktor general i un direktor finansiero”, segun Abraham a bisa.

Gastu

Aparte di e preokupashon riba e asunto di ‘governance’ na e kompania, tambe tin preokupashon riba e konsekuensianan finansiero di e kandela grandi ku a tuma luga algun siman pasá. 

Ta parse ku e kompania ke pasa e gastunan relatá na esaki na e Entidat Públiko. “Pero kada a entidat hurídiko, manera den e kaso aki un N.V. (kompania anónimo) ta resposabel pa su propio maneho i su propio gastu. Nan ta responsabel tambe pa hiba un maneho di tal forma ku ta prevení persona no-outirisá pa subi e tereno,  i por ehèmpel senda un kandela. No por ta ku e gastunan ku a hasi pa a paga e kandela, ta wòrdu pasá pa gobièrnu”, Abraham a splika.