KRALENDIJK – Kostanan di Boneiru ta asotá pa años kaba pa sargassum, un tipo di lima maron ku ta akumulá kantu di playanan i den awanan rondó di e isla. E aña aki e invashon a kuminsá un tiki mas lat ku kustumber, pero a sigui te lat den yüli.

Judith Raming, gerente di e Parke Marino Stinapa, ta konta di e impakto i e esfuersonan ku a hasi pa ataká e problema. “Sargassum a kuminsá e aña aki un tiki mas lat na Boneiru. El a kuminsá den e último siman di febrüari i henter luna di mart i aprel. Tambe a drenta hopi na luna di mei. Despues el a plama,” Raming ta bisa. “E sargassum tabat’ei tambe den luna di yüni. Pero awor den yüli nos ta aserkando di bèrdat e final di e temporada. Nos ta sakando awor e bum di sargassum ku tin den Lagun for di awa. Despues nos ta hasi esei na Bahia di Lac.”

Segun Raming 2022 tabata e aña mas pisá te ku awor. “E tempu ei por ehèmpel nos mester a saka e sargassum ku un horketa.” Sinembargo 2024 ta parse di bira un aña, kaminda mas sargassum a bini den direkshon di Boneiru. “Afortunadamente nos tin mihó material pa proses’é. Sinembargo mi ta mira ku riba sierto dia henter nos tim ta den un skema rotativo pa yuda. Tambe e temporada a dura nunka asina largu manera e aña aki. Ta p’esei e tabata un temporada di sargassum pisá pa Stinapa”.

Tur aña ta traha un rapòrt di evaluashon riba e esfuersonan rondo di Lac i Lagun. Ta kompartí e rapòrtnan aki ku gobièrnu lokal i Ministerio di Agrikultura, Peskeria, Siguridat di Kuminda i Naturalesa. Empresanan lokal ta yuda. Empresanan local di sùrf  tambe ta hunga un ròl krusial den kombatimentu di sargassum. “Nan ta saka tur e sargassum ku ta spula na tera na por ehèmpel Bahia di Lac. Stinapa ta traha huntu ku e skolnan di sùrf,” Raming ta konta. E koperashon ta esensial pa e organisashon, spesialmente den e lunanan mas drùk ku ta mart i aprel, na momento ku kasi henter e tim ta henter ora trahando riba e trabounan di limpiesa.

Un di e retonan mas grandi ta pa saka e sargassum dentro di tres dia for di awa. Esaki ta nesesario sino e ta kuminsá putri. “Nos por a invertí den ekipo pisá. Ta importante pa saka sargassum lihé for di awa i hib’é otro kaminda. E no mag keda muchu serka di awa,” Raming ta splika. “Nos ta hasi todo por todo pa hiba e sargassum Selibon. Pasobra nos sa ku e supstansianan ku tin den sargassum ta malu pa supsuela. 

Ounke a hasi hopi trabou kaba, ta keda e nesesidat pa ayudo eksterno. “Nos mester ainda di ayudo eksterno. Tin empresanan lokal ku ta yuda nos ku  trùk i èkskaveiter. Stinapa mes no tin sufisiente ekipo pa kombati’é. Fuera di esei e ekiponan ku nos tin no ta trahá pa e sirkumstansianan bou di kua nos mester traha. P’esei nos ta sigui desaroyá nos ekiponan,” Raming ta bisa.

Sargassum direkshon di nort di Bahia di Lac 

E situashon na Lac ta preukupante. “Ta importante pa protehá Bahia di Lac pa motibu di presensia di yerba di laman, turtuga i kanalnan di pal’i mangel”, segun Raming ku ta ekspresá su preukupashon.  “Na Lac nos ta mira mas i mas ku sargassum ta bini direkshon di nort. Nos mester protehá e área aki bon. Pues nos mester move e bumnan ku nos tin mas pa nort di moda ku e sargassum no ta drenta den e palunan di mangel. Tambe nos mester sera e kanalnan di pal’i mangel, di moda ku e no por drif drenta aki den,” Raming ta añadí.

Preukupashon pa henter área di Karibe

E problemanan ku sargassum no ta úniko pa Boneiru. “E tres islanan BES i e tres islanan CAS tur tin retu ku sargassum. Pa tanten Stinapa mester traha ku e ekipo i forsa laboral ku tin riba e isla. Malu malu lo por pone ‘harvesting boats’ riba laman”, segun Raming. E laman di sargassum ta keda un fuente di preukupashon pa henter área di Kariba i eifó, ku paisnan manera Mexico i kosta di Florida ku tambe sa ta afektá gravemente. “Hopi biaha nos ta haña e pregunta tambe dikon Stinapa no ta pone bumnan parti pafó di Bahia di Lac i Lagun, di moda ku e sargassum no por drenta e bahia. Nos a buska pa haña sa esaki ku diferente empresa lokal i Hulandes. Na e momento aki esei no por. E bumnan ta daña pa motibu di olanan i koriente. Tambe nos no por tira anker bon den profundidat”, segun Raming.

Banda di e retonan ekológiko i operashonal, e krisis di sargassum tin tambe un impakto sikológiko riba e rangernan di Stinapa. “Mirando for di punto síkiko ta dushi pa nos rangernan ku e temporada ta kasi kabando. Nos ta kontentu ku e trabou ku a desplegá. Kaminda antes mester a traha ku man, nos tin awor mihó ekipo. Tur hende ta kontentu ku nan tin mag di traha den e mashinnan ei.” Raming ta bisa. Ounke ku físikamente e trabou ta pisá i hopi biaha malagradisí, e ta pèrkurá finalmente ku e naturalesa ta eksperensiá ménos daño i ku e molester di holó stinki ta keda limitá pa e pueblo lokal.