WILLEMSTAD – Minister Charles Cooper di Ministerio di Tráfiko, Transporte i Planifikashon Urbano (VVRP) na Kòrsou ta pará kompletamente tras di Z Air ora ta trata e difikultatnan ku e kompania di aviashon ta konfrontando pa haña un pèrmit di e outoridatnan di aviashon Sint-Maarten.

Esei ta sali na kla entre otro den un entrevista ku Cooper tabatin djaweps ku Dwight Rudolfina di Radio Mas  na Kòrsou. E minister a ripití, manera el a laga sa anteriormente kaba, ku e ta duna balor fuertemente na igualdat, konkurensia hustu i funshonamentu di merkado. “Finalmente esei ta na interes di e biaheronan entre e islanan”, segun Cooper.

Mientrastantu Cooper a indiká tambe ku e tabatin vários biaha kontakto al respekto ku su kolega na Sint-Maarten, Grisha Heyliger-Marten. Tambe a manda mientrastantu diferente dokumento pa Sint Maarten Civil Aviation Authority (SMCAA). Cooper a indiká mas aleu ku mientrastantu tabatin un reunion ku entre otro Federal Aviation Authority (FAA) di Estados Unido. Nan ta indirektamente enbolbí den e dosié, pasobra netamente e registrashon Merikano N riba e avionnan di Z Air ta un sumpiña den wowo di e outoridat di Sint-Maarten. “Un argumento buská”, asina Cooper a deskribí e aktitut di banda di Sint-Maarten.

ICAO

Segun Cooper no solamente Sint-Maarten no tin rason ku su posishon, pero ku for di kòmbersashonnan ku FAA lo a resultá ku Kòrsou i Z Air lo tin motibu pa entregá un keho kontra SMCAA serka  International Civil Aviation Organization (ICAO). 

Cooper mes mester tuma un desishon riba término korto tokante e petishon di Winair di Sint Maarten pa por realisá mas buelo entre Kòrsou i Sint-Maarten. Den un prosedura, ku Winair a entamá,  Cooper a haña e enkargo di korte pa tuma un desishon motivá riba e petishon promé ku 5 di ougùstùs. Ta parse ku e minister ainda no ta masha entusiasmá pa esaki, pa motibu di e polémika ku a surgi mientrastantu ku e isla ruman.