KRALENDIJK – Sports for Children (SFC), un organisashon ku ta rekohé artíkulonan di deporte i gemnastik uzá na skolnan i organisashonnan di deporte ta bai hasi donashon di artíkulonan di deporte na Let’s Move na Boneiru. Aña pasá Let’s Move a bini den kontakto ku SFC, loke a krese i bira un koperashon fruktífero. Let’s Move ta konsentrá su mes riba organisá aktividatnan di deporte na Boneiru i ta aspirá pa hasi esaki aksesibel pa tur hende.

Debí na e koperashon ku Let’s Move, SFC sa ku e artíkulonan di deporte ku a pidi ta nesesario i ku lo hasi bon uzo di nan. Aña pasá Nirint Shipping BV a hasi donashon di un kònteiner, ku awor ta uza komo depósito i lugá di troka paña pa e Klup di Hòki na Boneiru.

Diferente sektor ta sostené e inisiativa 

Jolien Wissink ku ta traha na Let’s Move Bonaire ta bisa: “E aña aki atrobe tabatin nesesidat di artíkulonan di deporte na skolnan, akohidanan despues di skol (bso), Indebon i Let’s Move. Nan a tuma tambe di nobo e gastunan di transporte pa nan kuenta i ta pèrkurá pa e kònteiner yega Boneiru. Always Transport ta regla e dokumentashon i Don Andres ta yuda ku pone e kònteiner na e sitio”. Let’s Move ta traha entre otro tambe ku Indebon i VWS.

Toren di básketbòl 

E kònteiner, ku ta yega Boneiru 31 di ougùstùs, tin tambe dos toren di básketbòl profeshonal, ku a bira posibel mediante Bònt di Básketbòl Hulandes. SFC ta dispuesto pa bini Boneiru pa hinka e torennan di básketbòl den otro i parti e artíkulonan di deporte. Sinembargo, no ta sigur ainda si di bèrdat nan por bini pa motibu di eskases di medionan finansiero pa entre otro e personal ku lo mester a buk un akomodashon ku esei. E hinkamentu di e torennan mester sosodé profeshonalmente pa garantisá seguridat.