KRALENDIJK – Fundashon Tienda pa Konsumidó Boneriano (FTPKB) ta preokupá pa un subida den preis basta grandi di diferente produkto ku tin mester pa kas. Den e periodo di aprel te ku yüni 2024, a nota un subida bastante kosiderabel den preis di vários produkto den kategorianan esensial, segun e lista di makutu básiko di e fundashon. 

Den kategoria di karni i piská, por a mira un subida di presi di 27% na mei i 17% na yüni. Pa loke ta trata berdura ku fruta, por a mira un subida di 15% na mei, siguí pa un bahada di 5% na yüni. Artíkulonan pa beibi a subi 6% na mei i 3% na yüni.

“E subidanan aki ta impaktá partikularmente e kasnan di famia vulnerabel, i hende ku entrada mas abou. Ounke ku ora ta wak subida di preis limitá ora kalkulá un promedio i preisnan ta mustra relativamente stabil ku un subida di 4,29% te na  4,3% na yüni, esaki no ta kita ku  por mira un tendensia preokupante den sierto kategoria di produkto importante”, asina FTPKB a bisa.

Data di CBS tambe ta mustra ku produkto i servisnan den e segundo kwartal di 2024 a subi ‘djies’ 2,5% mas ku un aña pasá, ku ta ménos ku 3,4% inflashon den e primer kwartal, pero segun FTPKB esaki no ta e historia kompleto.

Gasta ku kuidou

FTPKB ta rekomendá konsumidó na e isla pa prespuestá nan gastunan kuidadosanmente, kompará preis pa wak na unda algu ta mas barata, skohe produkto lokal i purba kumpra na kantidat grandi, ounke sea den koperashon ku otronan.  

Segun FTPKB ta bisa, e subida kontinuo di preis aki, ta nifiká ku mester bin ku mas medida pa protehá e forsa di kompra di suidadano, i mantené preis di produktonan esensial na un nivel aseptabel.