KRALENDIJK – Un proyekto di sushi ku ta enserá ponementu di konteinernan di sushi bou di tera na Boneiru ku no a finalisá, ta kondusí na preukupashonnan kresiente bou di empresarionan lokal. Boudewijn Scholts, representante di Crown Business Center Bonaire BV, ta mira kambionan positivo pa rekohé sushi na Boneiru, pero ta bisa ku e ta preukupá tambe pa un kònteiner bou di tera den sentro di Kralendijk ku no a finalisá.

,,Nos ta kontentu ku a drecha e kaya den sentro di siudat,” segun Scholts, ku a mira aña pasá ku huntu ku e drechamentu di kaya a traha un kònteiner bou di tera na su empresa den Kralendijk.  “Pero mi tin mi preguntanan si tokante e organisashon di e proyekto aki. Pasobra mientrastantu for di sèptèmber tin un buraku grandi den suela. Mi ta kalkulá ku esaki ta 2,5 pa 3 meter hundu. Mi ta hopi preukupá pa seguridat di habitante- i turistanan. Un aksidente ta djis tras di porta ei. Sigur ku e profundidat di e buraku aki. Si un hende mester kai aki den, e konsekuensianan por ta grandi”.

A pone e kònteiner bou di suela aña pasá entre Museo Terramar i Bon Wokkie. Na promé instante a pone hèki rondó di e buraku ora ku a kompletá e proyekto, pa atvertí hendenan ku ta kana pasa. Na e momentu aki mayoria hèki a disparsé i a sobra dos so. E posibilidat pa kai den e buraku ta konsiderabel.

Inklaridat 

E empresa di prosesá sushi Selibon a laga Bonaire.nu sa ku nan no tin informashon tokante e proyekto. Nan ta referí na Supervishon i Mantenshon di Entidat Públiko Bonaire, ku na nan turno ta bisa ku e responsabilidat ta serka R&O Bonaire.

“Pero laga mi ta bon kla. Mi ta kontentu ku Entidat Públiko di Boneiru (OLB) a tuma e inisiativa aki. Kònteinernan di sushi bou di tera ta na mi opinion ideal pa promové higiena den sentro di siudat. Mi ta sostené OLB ku e inisiativa aki i mi ke posishoná mi mes konstruktivo den nan direkshon. Pero si mi ta puntra mi mes dikon no ta kaba e trabou? No tin kònteiner ainda riba e isla ku por buta nan? I kon ta pará ku e sistema pa rekohé e sushi aki den? Ta parse sinembargo komo sifuera no a bestèl trùk i kònteiner pa finalisá e proyekto, di manera ku e proyekto a keda para ketu. Esaki ta e kaso ya pa djes luna kaba. Lamentablemente no tin komunikashon ku nos”, segun Scholts.