KRALENDIJK – E parke di panel solar na Boneiru ta generá hopi mas energía ku a esperá. Sifranan di e promé sinku luna di 2024 ta mustra ku pa averahe 19% mas energía a wòrdu produsí ku e lokual ku tabata sperá. Esaki ta bira kla for di un  boletin informativo ku Bonaire Bon Transition (BBT) a presentá siman pasá.

E luna di mart tabata e mihó luna di e aña aki te awor, ku un produkshon di no ménos ku 921 kWh, ku ta 46% mas ku e lokual ku tabata sperá. E oumento den produkshon di energía solar ta yuda Boneiru no solamente pa kumplí ku e demanda ta kresiente na elektrisidat, pero tambe ta kontribuí na sostenibilidad pa disminuí emishon di CO₂.

Dor di e kousa di propiedat di ContourGlobal Boneiru i BBT, e invershon nesesario den energía solar i bientu pa Boneiru por tuma lugá, mientras ta tene tarifa di energía bou di kòntròl.

Segun BBT, e resultado ta kompatibel ku e obhetivonan di Boneiru pa logra un produkshon di energía mas sostenibel i diversifiká. ContourGlobal Boneiru i BBT ta bisa di ta masha satisfecho ku e resultadonan lográ te asina leu.

Krusial

“E promé resultadonan ku a logra ta nifiká ku por sigui traha aktívamente riba  desaroyo i ekspanshon di energía solar i di bientu, huntu ku otro partnernan na Boneiru. E esfuersonan ku ta hasi awor aki ta krusial pa e generashon di energía pa e generashon aki i e generashonnan ku ta bin,” BBT a bisa.