PHILIPSBURG – E koalishon dirigí pa médiko Luc Mercelina a sali mas fuerte for di e elekshon ku a tene na St. Maarten djaluna. Tantu e partido URSM di Mercelina mes, komo partner di koalishon DP a gana un asiento mas, ku kada un tres asiento na tur. E di tres partner di koalishon, PFP, tambe a gana na voto, pero a mantené su dos asiento aktual. E di kuater partner di e koalisahon 4×2, NOW, a pèrdè un asiento i keda ku solamente unu.

Mercelina tambe a bira e polítiko ku mas tantu voto personal: 1315 na tur. Hopi votadó na St. Maarten ta sinti ku Mercelina kasi no a haña chèns di goberná promé ku su gobièrnu a wòrdu tumbá apenas 17 dia despues di a sinta.
E partido National Alliance di èks-promé minister Sylveria Jacobs a bira e partido mas grandi, ku un total di mas o ménos 30 voto mas ku URSM di Mercelina. Mirando e resultado fuerte di e koalishon aktual, lo bira hopi difísil pa yega na otro gobièrnu bou di liderazgo di National Alliance.

Popular

Otro polítiko ku a skor bon ta Ludmilla de Weever (PFP) ku 690 voto, Otmar Ottley (UP) ku 666 voto, i Grisha Heyliger-Marten (DP) ku 477 voto.

E polítiko kontroversial Olivier Arrindell no a logra realisá su ambishonnan: su partido a yega na algu mas ku 500 voto. Ku esaki, Arrindell ni su partido lo no drenta parlamentu.